Jarmošyna pra Karatkievič: Spadziajusia, što hetaja baba vystaić i jany jaje nie zatraviać
Na dumku staršyni CVK, takaja «niezaležnaja» pravierka zdadzienych pretendentami ŭ prezidenty podpisaŭ pravakuje «razdraj» u hramadstvie.
Pry žadańni možna źviarnucca da prakurora, kab pravieryŭ, ci niama ŭ stvareńni takoj kamisii pieravyšeńnia paŭnamoctvaŭ. Tak staršynia Centrvybarkama Lidzija Jarmošyna kamientuje Jeŭraradyjo namier šerahu demakratyčnych struktur stvaryć niezaležnuju kamisiju, kab pravieryć sapraŭdnaść zdadzienych za Taćcianu Karatkievič podpisaŭ.
«Heta niesuśvietnaje hłupstva i ŭvohule heta — parušeńnie zakona. Pry žadańni možna prakurora spytacca, ci niama tut pieravyšeńnia jakich paŭnamoctvaŭ. Ludzi zamachvajucca na toje, što zamacavana Kanstytucyjaj — što vybary ŭ nas u krainie pravodziać vybarčyja kamisii. A tut demanstratyŭna pakazvajuć: nie, jość jašče niejkija arhanizacyi, jakija majuć prava padmianiać vybarčyja kamisii. I tamu — chaj nie žartujuć tak!».
Pa słovach staršyni CVK, praca takoj kamisii nie pryviadzie da parazumieńnia ŭnutry apazicyi. Naadvarot, sam fakt takoj pravierki pryniasie «razdraj i sumnievy ŭ hramadstva — nielha niedaaceńvać palityčnuju chvalu na pustym miescy, jakaja moža ŭźniknuć». Jarmošyna ŭpeŭnienaja, što treba nie zajmacca niejkimi pravierkami, a «radavacca tamu, što kandydataŭ budzie bolš». Stvareńnie ž takoj kamisii staršynia CVK ličyć dziejańniem, nakiravanym na zryŭ vybaraŭ.
«Mnie, ščyra kažučy, jaje (Taćcianu Karatkievič) škada. Ja spadziajusia, što hetaja baba vystaić i jany jaje nie zatraviać», — kaža Lidzija Jarmošyna.
Nahadajem, inicyjatyŭnaja hrupa Taćciany Karatkievič zdała 107 tysiač podpisaŭ. Ich pravierkaj zajmajucca vybarčyja kamisii.
