U Biełarusi z 1 studzienia pavialičvajecca minimalny staž dla naznačeńnia piensii z 10 da 15 hadoŭ
U Biełarusi z 1 studzienia 2015 hoda pavialičvajecca minimalny staž raboty dla naznačeńnia piensii pa ŭzroście i piensii za vysłuhu hadoŭ z 10 da 15 hadoŭ raboty z vypłataj abaviazkovych strachavych uznosaŭ u biudžet dziaržaŭnaha pazabiudžetnaha fondu sacyjalnaj abarony nasielnictva.
Adpaviedny ŭkaz numar 570 «Ab udaskanaleńni piensijnaha zabieśpiačeńnia» Alaksandr Łukašenka padpisaŭ 8 śniežnia, paviedamili ŭ pres-słužbie kiraŭnika dziaržavy.
Heta miera nie raspaŭsiudžvajecca na słabaabaronienyja katehoryi hramadzian, dla jakich farmiravańnie praciahłaha stažu abjektyŭna ŭskładniena (šmatdzietnyja maci, maci invalidaŭ ź dziacinstva, invalidy ź dziacinstva). Dla ich zachoŭvajecca minimalny staž raboty 5 hadoŭ.
Praduhledžvajecca taksama naznačeńnie sacyjalnaj piensii hramadzianam, jakija nie sfarmiravali minimalnaha pracoŭnaha stažu, nieabchodnaha dla naznačeńnia pracoŭnaj piensii pa ŭzroście, nie raniej dasiahnieńnia ŭzrostu 65 hadoŭ dla mužčyn i 60 hadoŭ dla žančyn. Pry hetym dziejučyja normy naznačeńnia sacyjalnych piensij zachoŭvajucca dla sacyjalna słabaabaronienych katehoryj hramadzian — dziaciej-invalidaŭ, invalidaŭ, u tym liku invalidaŭ ź dziacinstva, dziaciej, jakija stracili karmiciela.
Dakumientam praduhledžvajecca z 1 studzienia 2015 hoda dla vyličeńnia piensii pa ŭzroście za kožny poŭny hod stažu raboty zvyš 35 hadoŭ u mužčyn i 30 hadoŭ u žančyn pavieličeńnie piensii na 1 pracent siaredniamiesiačnaha zarabotku, ale nie mienš čym na 0,7 pracenta siaredniaj zarabotnaj płaty rabotnikaŭ u krainie, što prymianiajecca dla karekciroŭki faktyčnaha zarabotku piensijaniera.
Z 1 studzienia 2016 hoda piensii asobam, jakija dasiahnuli piensijnaha ŭzrostu, pavialičvajucca na 0,1 pracenta, 0,2 pracenta, 0,3 pracenta, 0,4 pracenta, 0,5 pracenta siaredniamiesiačnaha zarabotku adpaviedna za kožny hod stažu raboty zvyš 40 hadoŭ pa 45-y hod uklučna ŭ mužčyn i zvyš 35 hadoŭ pa 40-y hod uklučna ŭ žančyn.
Hraničnaja vieličynia siaredniaj zarabotnaj płaty, što ŭličvajecca pry vyličeńni piensii asobam, jakija majuć staž raboty 36 hadoŭ i bolš u mužčyn i 31 hod i bolš u žančyn, pavialičvajecca da piacikratnaj.
Pry vyličeńni pracoŭnaj piensii ŭvodzicca abaviazkovaje prymianieńnie danych ab zarabotnaj płacie, zafiksavanych u sistemie piersanifikavanaha ŭliku płacielščykaŭ i ŭznosaŭ.
Pavialičvajecca hraničnaja vieličynia siaredniaj zarabotnaj płaty z čatyrochkratnaj da piacikratnaj dla vypłaty abaviazkovych strachavych uznosaŭ u dziaržaŭny pazabiudžetny fond sacyjalnaj abarony nasielnictva dla rabotadaŭcaŭ i pracujučych hramadzian.
