Napiaredadni Dziadoŭ pad Šarkaŭščynaj ŭšanavali pamiać žycharoŭ spalenych u vajnu viosak
Naprykancy kastryčnika ŭ Šarkaŭščynskim rajonie Viciebskaj vobłaści prajšła akcyja pamiaci z udziełam pradstaŭnikoŭ miascovaj ułady, hramadskich arhanizacyj, miascovych žycharoŭ, u tym liku tych, jakim udałosia vyžyć padčas toj strašnaj trahiedyi.
U listapadzie 1942 hoda ŭ Šarkaŭščynskim i susiednich rajonach niamieckija akupanty pry praviadzieńni karnaj apieracyi «Niurnbierh» spalili bolš za 30 viosak. Zahinuła kala 3000 mirnych žycharoŭ.
Na miescy pachavańnia achviaraŭ u vioscy Šyci adbyŭsia žałobny mitynh, dalej mierapryjemstva praciahnułasia ŭ Domie kultury ŭ vioscy Jody. Jak paviedamiŭ pravasłaŭny śviatar, jaki prysutničaŭ na mierapryjemstvie, achviary pachavanyja jakraz na tym miescy, dzie niekali stajała pravasłaŭnaja carkva. Ciapier tut pomnik, ustalavany jašče ŭ savieckija časy.
