Andrej Aramnaŭ: «Ja vielmi chaču ŭziać druhoje alimpijskaje zołata. Imknusia zrabić usio, kab heta adbyłosia»
Rekardsmien płaniety ŭ ciažkaj atletycy raskazvaje pra treniroŭki na miažy invalidnaści, navukovyja ambicyi i samaje važnaje dla biełarusaŭ — šanavańnie svajoj kultury.
Adzin z najiarčejšych biełaruskich spartoŭcaŭ Andrej Aramnaŭ znoŭ nahaniaje žach na svaich apanientaŭ. Zdavałasia, paśla čatyrochhadovaj paŭzy ŭ vystupleńniach rekardsmien śvietu ŭžo nie vierniecca na pamost.
Ale sioleta ŭviesnu asiłak choć i z traŭmaj, ale zajaviŭsia na čempijanat Jeŭropy i adrazu ž uziaŭ bronzavy miedal. I choć na pieršynstvie płaniety ŭ listapadzie Andrej nie vystupić, u krasaviku jon płanuje dalačyć usie balački, abkatacca na Jeŭropie, a potym metanakiravana rychtavacca da Alimpijady-2016.
Skieptyki byli śpisali Aramnava z rachunkaŭ. Alimpijski čempijon Piekina hadami nie vystupaŭ, jamu tatalna nie šancavała ŭ płanie traŭmaŭ. Prablemaŭ dadavaŭ i bieskampramisny buntarski charaktar.
Adnak kampietentnyja ludzi razumieli, što Aramnaŭ navat na chatnich spabornictvach uvieś čas nabližajecca da suśvietnaha rekordu. Zadača pierad atletam nasamreč adna: padvodzicca da čempijanataŭ biez traŭmaŭ.
— I z hetym u apošni momant ja nie spraŭlajusia. Vialikija rekordy — heta kuča drobiaziaŭ. Kali niešta ź jaje vypadaje, usia jana rassypajecca, — vobrazna raskazvaje asiłak pra prablemy. — Ja chacieŭ by pabić suśvietny rekord i maju na heta siły. Ale nie chapaje tryvałaści majmu arhanizmu. Za treniroŭku potam vychodzić 2 kh. Kab stać žaleznym, kab nie łamalisia kiści, ja pavinien zamiaščać šmat surjoznych mikraelemientaŭ, kab serca pracavała i myšcy ŭmacoŭvalisia. Dla hetaha patrebnaje adpaviednaje charčavańnie i farmakałohija. I choć da mianie ŭ hetym płanie pavyšanaja ŭvaha, jana ŭsio adno niedastatkovaja.
— Dyk ci maje Andrej Aramnaŭ impet pabić svoj ža suśvietny rekord?
— U niekatorych krainach heta było b mahčyma. Spartsmiena z usich bakoŭ padtrymlivajuć, nie piarečać, nie pieraškadžajuć. Mnie trymacca kala suśvietnych rekordaŭ — heta jak iści pa vastryi laza. Adzin niapravilny drobny ruch — i invalidnaść. Pry našaj miedycynie i našych technałohijach składana dasiahać najvyšejšych vynikaŭ. My maładaja kraina, nie padrychtavali naležnaha ŭzroŭniu miedykaŭ, trenieraŭ. Pracujem z tym, što zastałosia ad SSSR. Usio jašče nie vielmi abdumana i pravierana časam. Tamu pasprabuj chacia b raz pieramahčy na Alimpijadzie! I kali ŭpeŭniŭ siabie i pačynaješ ujaŭlać, jakija vydatki buduć padčas druhoha zachodu i jakija dyvidendy, to dumaješ: «Ja što, durań?» Heta kali ščyra.
— A matyvacyja kštałtu «dla naroda, dla historyi, dla vysokich metaŭ»? Usio ž ci varta čakać vas na Alimpijadzie-2016?
— Ja vielmi chaču ŭziać zołata. Imknusia zrabić usio, kab heta adbyłosia. Ja ŭsio adno budu iści pa vastryi laza. Adzinaje, što mianie moža vybić z kalainy, — heta traŭma. I tut ja pad plity leźci nie budu. Jany mohuć złamać. Arhanizm moža łopnuć, jak struna. Tamu budu ŭpinacca i sprabavać. Kali dadziena — to dadziena, kali nie… Ja nasamreč niekali ŭžo pravieryŭ siabie na 100 pracentaŭ. Zaraz ja, kali budu vyjhravać Alimpijadu, budu heta rabić u zadavalnieńnie. Kali nie atrymajecca, budu trenieram. Ja adčuvaju, što raźbirajusia ŭ tym, jak padrychtavać čempijona. Užo siońnia ja dapamahaju niekatorym spartsmienam. Byvajuć i takija, što kažuć: «Ja Aramnava słuchaju, a ŭ mianie nie atrymlivajecca». Značycca, niapravilna słuchaješ. Bo ja kali daŭ ałharytm, adchilacca ad jaho nielha. Ja viedaju, što takoje idealnaja padrychtoŭka. Heta kali ty pavinien addać siabie ŭsiaho: uvieś svoj čas, usie svaje siły i ŭvieś svoj nastroj. Ty nie pavinien ni pra što lišniaje dumać. Kali šmat dumaješ — štanha uvieś čas padaje…
— Jak zrabić tak, kab naša ciažkaja atletyka vyjšła na topavy ŭzrovień?
— U Biełarusi takaja pryroda i takija hiennyja dadzienyja, što naradžajucca vielmi mocnyja ludzi. I žyvuć u dobraj klimatyčnaj abstanoŭcy. Vielmi šmat mocnych ludziej. Voś Leanid Taranienka. Nichto dahetul nie moža pabić jaho rekord. Alaksandr Kurłovič u svoj čas rvaŭ bolš za ŭsich u śviecie. Ja pabiŭ 27 suśvietnych rekordaŭ. I heta tolki prykłady z adnaho vidu sportu. A nie chapaje u nas taho, što treba šmat siłaŭ vydatkavać na navučańnie. Treba skiroŭvać namahańni ŭ bok piśmiennaści trenieraŭ i spartsmienaŭ. Pakul nie chapaje mazhoŭ. Nam treba z usiaho śvietu sabrać viedy, tym bolš što jość takaja mahčymaść. I praź niejki čas źjavicca pakaleńnie, jakoje daść dobry vynik. Pakul ža jość tolki adzinki. Viedy — zołata. Heta razumiejuć, naprykład, u majoj VNU.
— U jakoj? Va ŭniviersitecie fizkultury?
— Nie, ja adtul syšoŭ. Ciapier navučajusia ŭ Biełaruskim nacyjanalnym techničnym univiersitecie. Tam dobryja tradycyi, bierahuć važnyja viedy. Heta adna z samych razumnych VNU ŭ krainie. U nas mnohaje dobraje pierajmajuć z usiaho śvietu. U BNTU mianie zrazumieli i mnohim mnie dapamahli. U budučyni ja płanuju adkryć daśledčuju łabaratoryju, jakaja mahła b pracavać na karyść biełaruskaha sportu. Chaciełasia b abaranić u hetaj łabaratoryi hruntoŭnuju navukovuju pracu. Ale padrabiazna pra heta raskazvać pakul rana.
— Moža być, nie varta rupicca pra raźvićcio biełaruskaha sportu? Pobač Maskva — vializnaja i bahataja impieryja. Jany nie suprać, napeŭna, «uziać pad apieku» našu krainu, ukinuć hrošy ŭ sport.
— Nie. Ja liču, što dzie naradziŭsia, tam i spatrebiŭsia. Pa-druhoje, treba pomnić i šanavać usio, što adbyvajecca ŭ TVAJOJ krainie. Heta ja pra movu, historyju i kulturu. Pry hetym nam ništo nie zaminaje źmiešvacca ź inšymi narodami. Čym bolš budzie źmiešvacca narod, tym budzie macniejšy čałaviek, ź lepšym imunitetam. Heta čysta maja dumka. Ale vielmi važna pry hetym šanavać svaju kulturu i na jaje aryjentavacca. Dobraja kultura ci drennaja — vielmi važna jaje šanavać…
«Bajcoŭski hien» — prajekt kampanii «Budźma biełarusami!», meta jakoha — paznajomić hramadstva z našymi vybitnymi spartoŭcami! Časta ich lepš viedajuć za miažoj, čym doma. A jany zazvyčaj majuć unikalnyja losy, pra jakija varta viedać. Jany — nośbity biełaruskaha bajcoŭskaha hienu — hatovyja zaciata bicca za honar krainy i kožnaha biełarusa. Znajomciesia bližej, hanaryciesia imi, zaŭziejcie za našych!
