Śpiecnaz ZŠA rychtujecca zmahacca z «hibrydnaj vajnoj»
Kamandavańnie śpiecyjalnych sił ZŠA zrabiła ŭ kancy vieraśnia hetaha hodu dakład pa supraćstajańni nietradycyjnym mietadam viadzieńnia bajavych dziejańniaŭ, paviedamiŭ sajt publicintelligence.net.
Žaŭniery Sił śpiecyjalnych apieracyj ZŠA.
Mietady hibrydnaj vajny ŭ svajoj najbolš vyraznaj i nieprystojnaj formie byli prademanstravanyja Rasijaj, jakaja padtrymała antyŭkrainskich bajevikoŭ ŭ hetym hodzie, pišuć amierykanskija analityki.
Pad hibrydnaj vajnoj jany razumiejuć vykarystańnie dziaržavaj ci arhanizacyjaj, jakaja maje peŭnyja dziaržaŭnyja rysy, usich mahčymych dypłamatyčnych, infarmacyjnych, vajskovych i ekanamičnych srodkaŭ destabilizacyi praciŭnika, jakomu nie abjaŭlenaja aficyjnaja vajna.
«Apałčeńnie Navarosii».
«Rasija ciapier vykarystoŭvaje siły śpiecnazu, vyviedki, palityčnych pravakataraŭ i pradstaŭnikoŭ ŚMI, a taksama mižnarodny kryminalitet va ŭschodniaj i paŭdniovaj Ukrainie. Praz kramloŭskaje finansavańnie, z častkovym pryznańniem ci admaŭleńniem svajho ŭdziełu, Rasija vykarystoŭvaje svaich «zialonych čałaviečkaŭ»… z metaj stvareńnia chaosu, źniščeńnia hramadskaha paradku, pravakavańnia sił biaśpieki na praźmiernaje vykarystańnie siły, kab delehitymizavać urad u Kijevie», — havorycca ŭ dakładzie.
Rasiejskija žaŭniery biez apaznavalnych znakaŭ u Krymie.
Hetkija ž mietady Rasija moža vykarystać i suprać inšych postsavieckich krain, adznačajuć śpiecyjalisty Sił śpiecyjalnych apieracyj ZŠA.
ZŠA i Arhanizacyja paŭnočna-atłantyčnaj damovy, pa ich dumcy, musiać vypracavać stratehiju i dakładnyja płany pa zmahańni z pahrozaj hibrydnaj vajny, jakaja składajecca z ekanamičnych i dypłamatyčnych sankcyj, ekanamičnaj i vajskovaj dapamohi dziaržavam-achviaram, infarmacyjnych, vajskovych i antyterarystyčnych dziejańniaŭ suprać krainy ci arhanizacyi-ahresara.
