Rasija moža pačać rasśledavańnie ŭ suviazi z ekspartam Biełaruśsiu bitumu
Rasijski bok płanuje pravieści kompleksny analiz ekspartu bitumnych sumiesiaŭ ź Biełarusi. Razhladajecca pytańnie ab stvareńni mižviedamasnaj rabočaj hrupy pry ŭdziele Fiederalnaj mytnaj słužby RF, jakaja zojmiecca hetym pytańniem.
Miarkujecca, što vysnovy, jakija buduć padrychtavanyja pavodle vynikaŭ rasśledavańnia, mižviedamasnaja hrupa padaść u rasijski i biełaruski ŭrady.
Pavodle najaŭnych źviestak, rasijski bok maje namier prasić biełaruskich partnioraŭ dać rabočaj hrupie dostup da infarmacyi, jakaja adnosicca da ekspartu bitumnych sumiesiaŭ ź Biełarusi. Nie vyklučana taksama, što mižviedamasnaja hrupa moža naviedać biełaruskuju vytvorčaść bitumnych sumiesiaŭ.
Pravieści kompleksny analiz ekspartu biełaruskich bitumnych sumiesiaŭ Rasija płanuje ŭ metach spynieńnia paŭtoru schiemy z hetak zvanymi rastvaralnikami, jakuju Minsk vykarystoŭvaŭ u 2012 hodzie. Rasijanie padazrajuć, što pad prykryćciom bitumnych sumiesiaŭ biełaruskija pastaŭščyki mohuć ekspartavać naftapradukty i takim čynam nie vypłačvać vyvaznyja pošliny ŭ rasijski biudžet.
U Maskvie źviartajuć uvahu na toje, što rost ekspartu biełaruskich bitumnych sumiesiaŭ u 2014 hodzie prykładna roŭny panižanamu abjomu vyviezienych z respubliki naftapraduktaŭ, pry eksparcie jakich za miežy Mytnaha sajuza Biełaruś pavinna pieraličvać vyvaznyja pošliny ŭ rasijski biudžet.
Tak, za studzień—žnivień hetaha hoda ekspart biełaruskich bitumnych sumiesiaŭ u fizičnym vyražeńni vyras na 658,3 tys. ton, a ekspart biełaruskich naftapraduktaŭ u hety ž pieryjad źniziŭsia na 612,3 tys. ton.
Rezki rost ekspartu biełaruskich rastvaralnikaŭ dva hady tamu staŭ padstavaj dla taho, kab Rasija zapadozryła Biełaruś u eksparcie paliva pad vidam rastvaralnikaŭ z metaj paźbiehnuć vypłaty vyvaznych pošlin na naftapradukty ŭ rasijski biudžet. Abmierkavańnie hetaha pytańnia tady dajšło da ŭzroŭniu premjer-ministraŭ i prezidentaŭ dźviuch krain. U vyniku ŭ vieraśni 2012 hoda kiraŭnik biełaruskaha ŭrada Michaił Miaśnikovič zajaviŭ pra spynieńnie ekspartu rastvaralnikaŭ.
