Mahieryni zaklikała Pucina vyvieści rasiejskija vojski z Ukrainy
Abranaja na pasadu Viarchoŭnaha pradstaŭnika Jeŭrapiejskaha Sajuza pa pytańniach zamiežnych spraŭ i palityki biaśpieki italjanka Fiederyka Mahieryni ŭ čaćvier zaklikała prezidenta Rasii Uładzimira Pucina vykonvać minskija damoŭlenaści i vyvieści rasiejskija vojski z Ukrainy.
Pra heta paviedamlaje italjanskaje infarmacyjnaje ahienctva Ansa.
Mahieryni, jakaja siońnia ŭ Rymie sustrełasia z kiraŭnikom aŭstryjskaha ŭrada, skazała, što Pucin pavinien «nieadkładna i kankretna» vykonvać dasiahnutyja ŭ Minsku damoŭlenaści i «vyvieści rasiejskija vojski z uschodu Ukrainy». Jana nazvała heta «nastojlivaj prośbaj».
Mahieryni, jakaja ŭznačalvaje zaraz italjanski MZS, adznačyła peŭny prahres u dasiahnieńni pieramirja na Danbasie, padkreśliŭšy, što situacyja zastajecca «jašče niaŭstojlivaj».
Polskaje infarmacyjnaje ahienctva RAR adznačaje, što kancler Aŭstryi Viernier Fajman na sumiesnaj z Mahieryni pres-kanfierencyi taksama zajaviŭ, što Rasija pavinna vyvieści svaje vojski z ukrainskaj terytoryi. Jon skazaŭ, što im «niama čaho šukać va Ukrainie».
Jak viadoma, Rasija, nasupierak šmatlikim dokazam, praciahvaje zajaŭlać, što na Danbasie niama jaje rehularnych vojskaŭ, jakija vajujuć na baku prarasiejskich uzbrojenych hrupovak. Pavodle acenak NATA, u Danieckaj i Łuhanskaj vobłaści moža być niekalki tysiač rasijskich sałdat z kala 20 tysiač bajavikoŭ.
