Departamient dziaržbiaśpieki Litvy rekamienduje litoŭcam, jakija admovilisia słužyć u savieckaj armii, nie jeździć u Biełaruś i Rasiju
Departamient dziaržbiaśpieki (DDB) Litvy nastojliva rekamienduje hramadzianam Litvy, jakija ŭ 1990—1991 hadach pa zakliku litoŭskich uład admovilisia słužyć u savieckaj armii, nie naviedvać Rasiju, Biełaruś i inšyja dziaržavy, jakija nie źjaŭlajucca členami Jeŭrasajuza (ES) ci NATA.
Jak paviedamlaje partał ru.delfi.lt, hety zaklik DDB źviazany sa sprobaj pravaachoŭnych orhanaŭ Rasii adnavić kryminalny pieraśled tych, chto pa zakliku ŭład Litvy paśla 11 sakavika 1990 hoda pakinuŭ savieckuju armiju ci admoviŭsia ŭ joj słužyć.
«U ciapierašniaj mižnarodnaj situacyi padčas pajezdak u zhadanyja dziaržavy moža źjavicca pahroza dla asabistaj biaśpieki hetych hramadzian», — zajavili ŭ DDB.
Kryminalny pieraśled z boku Rasii pahražaje prynamsi trom hramadzianam Litvy, jakija pa zakliku ŭład Litvy paśla 11 sakavika 1990 hoda pakinuli savieckuju armiju ci admovilisia ŭ joj słužyć. Hienprakuratura Litvy ŭžo atrymała prośbu ab pravavoj dapamozie ŭ spravie adnaho z takich hramadzian.
Pavodle danych Minabarony Litvy, paśla 11 sakavika 1990 hoda ad prymusovaj słužby ŭ savieckaj armii admovilisia 1.562 maładyja čałavieki. Ź ich 67 byli siłaj dastaŭleny ŭ voinskija čaści Uzbrojenych sił: 21 maładoha čałavieka ŭ noč na 27 sakavika 1990 hoda vyvieźli ŭ Mahadanskuju vobłaść, jašče 46 čałaviek byli «vyłaŭleny» paasobku i vyviezieny ŭ inšyja padraździaleńni savieckaj armii. 20 maładych ludziej atrymali turemnyja terminy, u dačynieńni da troch byli raspačaty kryminalnyja spravy, a troje maładych ludziej zahinuli.
1.465 maładych ludziej byli vymušany chavacca, źmianiać miesca žycharstva, pakinuć siemji, kab paźbiehnuć hvałtoŭnaj słužby i represij z boku savieckaj armii ci savieckich uład.
11 sakavika 1990 hoda rašeńniem Viarchoŭnaha savieta Litvy była adnoŭlena niezaležnaść krainy, a Vilnius abvieščany stalicaj respubliki. Da hetaha Litva ŭvachodziła ŭ skład SSSR.
