Hubarevič: Situacyja z abrańniem adzinaha kandydata ad apazicyi znachodzicca ŭ padviešanym stanie
Na siońnia situacyja z abrańniem adzinaha kandydata ŭ prezidenty ad apazicyi na vybarach 2015 hoda znachodzicca «ŭ padviešanym, zamarožanym stanie», paviedamiŭ pieršy namieśnik staršyni ruchu «Za Svabodu» Juryj Hubarevič.
«Tut možna spasłacca na pieryjad letnich adpačynkaŭ i ahulnaje źnižeńnie palityčnaj aktyŭnaści. Dumaju, vosieńniu temp pieramoŭ paskorycca», — skazaŭ jon.
Hubarevič adznačyŭ, što ruch «Za Svabodu» zastajecca «ŭ pracesie pieramoŭ ź inšymi demakratyčnymi siłami, razhladaje roznyja varyjanty ŭdziełu ŭ prezidenckich vybarach».
Pavodle jaho słoŭ, udzielniki pasiadžeńniaŭ «siamiorki» palityčnych partyj i arhanizacyj (akramia ruchu «Za Svabodu» heta Biełaruskaja partyja levych «Spraviadlivy śviet», Biełaruskaja sacyjał-demakratyčnaja partyja (Hramada), kampanija «Havary praŭdu», Abjadnanaja hramadzianskaja partyja, arhkamitet pa stvareńni partyi «Biełaruskaja chryścijanskaja demakratyja», Partyja BNF) razhladajuć praceduru praviadzieńnia kanhresa demakratyčnych sił i vyłučeńnia adzinaha kandydata.
Hubarevič taksama paviedamiŭ, što pazicyja ruchu «Havary praŭdu» «zastajecca niaźmiennaj». «My ličym, što nie tak istotna, jakoj budzie asoba kandydata, kolki pasłańnie, ź jakim jon pojdzie da hramadstva, jaho patencyjał i mahčymaści abjadnać bolšaść tych, chto razumieje nieabchodnaść pieramien u krainie. Taksama nam važnaja vyraznaja pazicyja adzinaha kandydata pa hieapalityčnym vybary Biełarusi: kudy my pojdziem, na jakija krainy budziem aryjentavać. Dla nas tut vielmi važny jeŭrapiejski vybar Biełarusi», — skazaŭ jon.
