BATE vyrvaŭ fantastyčnuju pieramohu ŭ «Debrecena». Budzie futbolnaja vosień! VIDEA
Barysaŭski BATE pravioŭ matč u adkaz treciaha kvalifikacyjnaha raŭnda Lihi čempijonaŭ. Supiernik – vienhierski «Debrecen». Sustreča tydniovaj daŭniny pryniesła kryŭdny vynik. Pry absalutna roŭnaj hulni vienhry zmahli atrymać pieramohu. Adziny hoł u druhim tajmie byŭ zabity ź pienalci sieniehalskim forvardam Ibrahimam Sidzibie.
By.tribuna.com
I pieršy tajm pačaŭsia ledź nie pad kapirku. Na 20-aj chvilinie sieniehalec adarvaŭsia ŭ centry pola ad Dzianisa Palakova i vyjšaŭ adzin na adzin z Černikam. Spačatku stadyjon uzradavana vyhuknuŭ – hoła nie było. A potym usie źviarnuli ŭvahu na žest šviedskaha arbitra Jochanesana, jaki ŭkazaŭ na adzinaccacimietrovy punkt. Sidzibie nie pramazaŭ – 0:1. A pa sumie dvuch matčaŭ dyk uvohule zusim niepryvabnaje 0:2.
Častka zaŭziataraŭ paśla hetaha paciahnułasia da vychada, nie vieračy ŭ toje, što BATE zmoža adyhracca. U fanackim siektary byŭ vialiki banier na biełaruskaj movie, adrasavany futbalistam: «Hulajcie tak, jak my zaŭziejem».
Adnym ź pierałomnych momantaŭ hulni stała vydaleńnie futbalista «Debrecena» Sielima Baŭdły. Spačatku jon atrymaŭ žoŭtuju za pieraškodu pry ŭdary štrafnoha, a paśla zavaliŭ u centry pola Siarhieja Kryŭca.
Paśla heta hulnia BATE ŭskałychnułasia. Ataki stanavilisia ŭsio bolš vostrymi. I hoł sapraŭdy vyśpiavaŭ. Naradziŭsia jon paśla taho, jak Michaił Hardziajčuk vycarapaŭ miač na samaj bakavoj stužcy, prakinuŭ jaho na Filipa Mładzienaviča, a ŭžo sierb addaŭ u centr. Alaksandr Vaładźko z «zabojnaj» pazicyi nie pramazaŭ – 1:1. Dychać stała značna viesialej.
Jašče da pierapynku trenier BATE Alaksandr Jermakovič źniaŭ z hulni piataha abaroncu Vitala Hajdučyka, vypuściŭšy forvarda Mikałaja Sihnieviča. Varta było bačyć, jak Siarhiej Kryviec u pierapynku zavodziŭ hledačoŭ.
U druhim tajmie barysaŭcam dastatkova chutka atrymałasia zabić druhi miač. Fłanhavaj pieradačaj Edhara Alachnoviča, jaki pierad hetym vyjšaŭ na zamienu, skarystaŭsia Vital Radzivonaŭ – 2:1.
Zdavałasia b, da ščaścia zastavałasia zusim krychu, a bolš dakładna adzin miač. «Debrecen», kali zapachła smažanym, taksama aktyvizavaŭsia. Ich ataki stanavilisia ŭsio bolš niebiaśpiečnymi.
Sudździa dadaŭ da asnoŭnaha času ažno šeść chvilin. Ale vastryni nie było. Zdavałasia, matč tak i skončycca vyjhryšam, ale adnačasova projhryšam barysaŭcaŭ.
Ale cud zdaryŭsia!!! Na čaćviortaj dadatkovaj chvilinie Kryviec zabiŭ taki nieabchodny treci hoł — 3:1.
Trybuny ŭzarvalisia. U Biełarusi budzie jeŭrakubkavaja vosień! Ciapier BATE čakaje svajho supiernika ŭ płej-of Lihi čempijonaŭ.
Apytanka
