Biełaruskaja turfirma źniała rekłamny materyjał «z-za padtrymki ŭkrainskich banderaŭcaŭ»
Lilija Kobzik — hałoŭny redaktar haziety «Turizm i otdych» — napisała artykuł ab tym, jak vieści siabie za miažoj, kab vas nie pryniali za ruskaha turysta i nie pabili. Nahodaj stała bojka ŭ tureckim hateli miž ukrainskim i ruskim turystami.
U vyniku hety artykuł nie spadabaŭsia rekłamadaŭcam z turfirmy «Irianna», bo, pa ich słovach, u im «padtrymlivajucca ŭkrainskija banderaŭcy i hnabiacca našyja ruskija braty». Artykuł Kobzik byli vymušany z sajta źniać.
My pazvanili ŭ turfirmu «Irianna» i zapytalisia, čym jany kiravalisia, kali kazali, što artykuł abaraniaje ŭkrainskich banderaŭcaŭ.
Spačatku adkazała maładaja dziaŭčyna i skazała, što ad samaha pačatku ich prosta «niapravilna zrazumieli». A artykuł ich aburyŭ z-za taho, što ŭ im idzie źniavaha biełarusaŭ, pra jakich «pišuć jak pra maŭklivych, bieschrybietnych istot».
Paśla słuchaŭku ŭziaŭ niepasredna kiraŭnik turfirmy, jaki i paprasiŭ artykuł źniać.
«Aŭtar napisaŭ absalutna nieadekvatny artykuł, u jakim kazałasia pra toje, što biełaruskaj nacyi nie isnuje, a biełarusaŭ ni na što nie zdolnyja. Ja takoje tryvać nie mahu. Bo ja hramadzianin Biełarusi i nie dazvolu, kab pra maju krainu tak pisali.
Pieradajcie hetaj damie dasłoŭna, što ja nie suprać ukraincaŭ, ja suprać tych prafašysckich partyj, jakija zaniali ŭrad. Ja suprać hetych partyj i suprać vajny, jakuju jany tam raźviazali. I punkt hledžańnia ZŠA i Zachadu ja tut padtrymlivać nie budu, nie dziela hetaha maje dziady vajavali».
Na pytańnie: «Čamu na sajcie turfirmy zamiest «Biełarusi» napisana «Biełoruśsija»? — mužčyna tolki paprasiŭ prabačeńni za niedaśviedčanaść redaktara sajtu i paabiacaŭ chutka vypravić hetuju niedarečnaść.
