Аналітыкаў разведкі ў ЗША на 75% заменяць штучным інтэлектам
Нацыянальнае агенцтва геапрасторавай выведкі ЗША (NGA) імкнецца да аўтаматызацыі сваёй працы, таму ўжо ў хуткім часе камп’ютары будуць ажыццяўляць 75% задач, якія ў дадзены момант выконваюцца аналітыкамі выведкі, паведамляе амерыканскі часопіс Foreign Policy.
Роберт Кардзіла, які з’яўляецца кіраўніком гэтай амерыканскай спецслужбы, паведаміў пра намеры «аўтаматызаваць» NGA на канферэнцыі ў Сан-Антоніа (Тэхас, ЗША). Штогадовая канферэнцыя, якая арганізоўваецца Агенцтвам геапрасторавай выведкі, аб’ядноўвае інжынераў, вайскоўцаў і спецыялістаў выведкі для абмеркавання пагроз нацыянальнай бяспекі і новых трэндаў.
Ужо зараз як спецслужбы, так і буйны бізнэс выкарыстоўваюць у сваёй дзейнасці штучны інтэлект. Напрыклад, паліцыя выкарыстоўвае спецыяльныя праграмы для прагназавання імавернасці злачынстваў у тым ці іншым раёне на аснове дадзеных статыстыкі.
Рабатызацыя і аўтаматызацыя выклікаюць асцярогі, што некаторыя прафесіі могуць проста знікнуць. Гэта вялікая пагроза для працоўных, асабліва ў прыватным сектары.
Страх згубіць працу прысутнічае і сярод разведчыкаў. Кардзіла прызнаў, што працоўная сіла «скептычна» і нават «цынічна» ставіцца да магчымай аўтаматызацыі. Кіраўнік спецслужбы хоча, каб машыннае навучанне дапамагло апрацоўваць вялікую колькасць здымкаў. Зараз гэтую складаную і руцінную працу робяць людзі.
Нацыянальнае агенцтва геапрасторавай выведкі ЗША не шукае канкрэтных асоб ці аб’екты ў адрозненне ад іншых спецслужбаў. Галоўная мэта гэтай установы — адсочваць паверхню Зямлі ў пошуках патэнцыйных пагроз, такіх як выпрабавальныя пляцоўкі ў Паўночнай Карэі.
