Analitykaŭ raźviedki ŭ ZŠA na 75% zamieniać štučnym intelektam
Nacyjanalnaje ahienctva hieaprastoravaj vyviedki ZŠA (NGA) imkniecca da aŭtamatyzacyi svajoj pracy, tamu ŭžo ŭ chutkim časie kampjutary buduć ažyćciaŭlać 75% zadač, jakija ŭ dadzieny momant vykonvajucca analitykami vyviedki, paviedamlaje amierykanski časopis Foreign Policy.
Robiert Kardziła, jaki źjaŭlajecca kiraŭnikom hetaj amierykanskaj śpiecsłužby, paviedamiŭ pra namiery «aŭtamatyzavać» NGA na kanfierencyi ŭ San-Antonia (Techas, ZŠA). Štohadovaja kanfierencyja, jakaja arhanizoŭvajecca Ahienctvam hieaprastoravaj vyviedki, abjadnoŭvaje inžynieraŭ, vajskoŭcaŭ i śpiecyjalistaŭ vyviedki dla abmierkavańnia pahroz nacyjanalnaj biaśpieki i novych trendaŭ.
Užo zaraz jak śpiecsłužby, tak i bujny biznes vykarystoŭvajuć u svajoj dziejnaści štučny intelekt. Naprykład, palicyja vykarystoŭvaje śpiecyjalnyja prahramy dla prahnazavańnia imaviernaści złačynstvaŭ u tym ci inšym rajonie na asnovie dadzienych statystyki.
Rabatyzacyja i aŭtamatyzacyja vyklikajuć aściarohi, što niekatoryja prafiesii mohuć prosta źniknuć. Heta vialikaja pahroza dla pracoŭnych, asabliva ŭ pryvatnym siektary.
Strach zhubić pracu prysutničaje i siarod raźviedčykaŭ. Kardziła pryznaŭ, što pracoŭnaja siła «skieptyčna» i navat «cynična» stavicca da mahčymaj aŭtamatyzacyi. Kiraŭnik śpiecsłužby choča, kab mašynnaje navučańnie dapamahło apracoŭvać vialikuju kolkaść zdymkaŭ. Zaraz hetuju składanuju i rucinnuju pracu robiać ludzi.
Nacyjanalnaje ahienctva hieaprastoravaj vyviedki ZŠA nie šukaje kankretnych asob ci abjekty ŭ adroźnieńnie ad inšych śpiecsłužbaŭ. Hałoŭnaja meta hetaj ustanovy — adsočvać pavierchniu Ziamli ŭ pošukach patencyjnych pahroz, takich jak vyprabavalnyja placoŭki ŭ Paŭnočnaj Karei.
