У Расіі скончыліся арыгінальныя запчасткі для iPhone і Macbook
Па словах экспертаў, з якімі пагаварыў журналіст газеты «Ведомости», у Расіі афіцыйна спынена абслугоўванне iPhone 14 і 15 серый, а запчасткі для смартфонаў папярэдніх пакаленняў перасталі пастаўляць у снежні 2023 года.
Ілюстрацыйнае фота
Як сцвярджае аналітык агенцтва Mobile Research Group Эльдар Муртазін, зараз сэрвісныя цэнтры завозяць у Расію кітайскія запчасткі для рамонту тэхнікі Apple, а таксама разбіраюць для папраўкі старыя тэлефоны.
У сетцы ReStore, якая прадае тэхніку Apple у Расіі, заявілі, што сэрвісныя цэнтры працягвалі забяспечваць гарантыйны рамонт тэхнікі, набытай да лютага 2022 года. Так як гарантыя на iPhone і Macbook дзейнічае 2 гады, у лютым 2024 года яна скончылася для ўсіх прылад, растлумачылі ў кампаніі.
«Цяпер гэтыя АСЦ [аўтарызаваныя сэрвісныя цэнтры] нічым не адрозніваюцца ад намётаў на Міцінскім рынку», — заявіла крыніца выдання ў кампаніі-вытворцы электронікі.