У Польшчы раптоўна памёр 38-гадовы беларус
У Польшчы раптоўна памёр 38-гадовы беларус, які працаваў на мэблевай фабрыцы. Цяпер ягоным жонцы і дзецям збіраюць фінансавую дапамогу. З паведамлення пра збор, арганізатарам якога пазначаная Аліна Цвяткова, вынікае, што ў 2021 годзе сям'я беларусаў пераехала з Мінска ў Беласток, піша Most.
Фота: Prateek Gautam / Unsplash
«Паціху наладжвалі побыт. Я падпрацоўвала на прыбіраннях, муж працаваў на мэблевай фабрыцы. Дзеці інтэграваліся ў школу. Будавалі планы на светлую будучыню. Але гэтаму не наканавана было спраўдзіцца», — напісала жанчына.
Беларуса не стала 6 сакавіка гэтага года. Як расказалі Most знаёмыя сям'і, сваякі вырашылі крэміраваць цела і ўжо перавезлі прах у Беларусь. Сям'я ж мужчыны прыняла рашэнне застацца ў Беластоку.
Муж і жонка пражылі разам 17 гадоў, у сям'і двое дзяцей. Старэйшая дачка паступіла ў Польшчы ў ліцэй і будзе працягваць навучанне, сын наведвае школу. Дзяўчынка і хлопчык цяжка пераносяць страту бацькі.
«Дзеля дзяцей я павінна быць моцнай. Цяпер я для іх і мама, і тата. Зыходзячы з гэтага прашу фінансавай дапамогі для маёй сям'і», — напісала жанчына.
Чытайце таксама:
На пляжы ў Аланьі памёр 76-гадовы беларус
Напісаў, дзе пакінуў рэчы і грошы. Што вядома пра гібель беларуса, якога знайшлі ў польскім порце
