Баксёр Уладзімір Клічко завяршыў кар'еру
Знакаміты ўкраінскі 41-гадовы баксёр Уладзімір Клічко завяршыў прафесійную кар'еру. Аб гэтым рашэнні ён паведаміў на сваім канале ў YouTube.
- 27 гадоў таму я зрабіў выбар. Абраў прафесію, якая стала маім жыццём. Я пачаў падарожжа ў спорт. Абраны шлях адкрыў мне свет - у літаральным сэнсе гэтага слова. Мала такіх краін на зямлі, дзе я не бываў. Я вывучыў замежныя мовы, стварыў свой бізнэс і аб'екты інтэлектуальнай уласнасці.
Я дасягнуў усяго, пра што марыў, і цяпер хачу пачаць маю другую кар'еру пасля спорту. Я ніколі не думаў, што ў мяне будзе такая доўгая і неверагодна паспяховая кар'ера ў боксе, — сказаў Клічко.
Баксёр заявіў, што зараз засяродзіцца на развіцці свайго брэнда і заклікаў заўзятараў далучацца і дзяліцца ідэямі.
За 21 год на прафесійным рынгу Уладзімір Клічко правёў 69 баёў - 64 перамогі (53 накаўтам) і 5 паразаў.
Быў чэмпіёнам свету па версіях Сусветнай баксёрскай арганізацыі (WBO, 2000-2003, 2008-2015), Міжнароднай баксёрскай федэрацыі (IBF, 2006-2015), Сусветнай баксёрскай асацыяцыі (WBA, 2011-2015) у суперцяжкай вазе.
Алімпійскі чэмпіён 1996 года.
Уладзімір Клічко — брат Віталя Клічко, таксама знакамітага баксёра і палітыка, які цяпер з'яўляецца мэрам Кіева.
