У Кобрынскім раёне мужчына памёр ад атручэння метылавым спіртам
У Кобрынскай бальніцы 15 красавіка ад атручэння метылавым спіртам памёр 67-гадовы мужчына, паведамілі ва УУС Брэсцкага аблвыканкама.
Мужчына трапіў у рэанімацыю 12 красавіка з дыягназам «вострае атручэнне метылавым спіртам». Паводле адной з версій, таксічная вадкасць у арганізм пенсіянера магла трапіць з шклоачышчальніка. Падчас агляду дома, у якім ён пражываў з жонкай, праваахоўнікі знайшлі каністру з рэшткамі вадкасці блакітнага колеру. Па факце гібелі мужчыны праводзіцца праверка.
Нагадаем, у Беларусі Пастановай Міністэрства аховы здароўя N122 ад 28 снежня 2006 г. «Аб зацвярджэнні гігіенічнага нарматыву» абмежаванае выкарыстанне метанолу ў шклоабмывальных вадкасцях. Усталяваны гігіенічны нарматыў яго ўтрымання складае ў канцэнтрацыі не больш за 0,05 аб'ёмнай долі.
Нягледзячы на абмежаванне, шклоабмывальнік з метылавым спіртам часам знаходзяць у Беларусі.
