У Полацкім раёне мужчына падпаліў кватэру сваёй знаёмай, тая загінула
Полацкім міжраённым аддзелам Следчага камітэта распачатая справа па ч. 2 арт. 139 КК у дачыненні да 55-гадовага мужчыны, які падазраецца ў забойстве, учыненым агульнанебяспечным спосабам.
Як паведаміла афіцыйны прадстаўнік упраўлення СК па Віцебскай вобласці Святлана Сахарава, 19 лістапада каля 22-й гадзіны на глебе асабістых непрыязных адносін да жыхаркі Полацкага раёна аднавясковец падпаліў яе кватэру, размешчаную на першым паверсе двухпавярховага дома.
Пасля ліквідацыі пажару ў кватэры быў знойдзены труп 61-гадовай гаспадыні кватэры. Акрамя таго, у рэанімацыйнае аддзяленне ўстановы аховы здароўя з апёкамі рознай ступені цяжкасці і атручваннем прадуктамі гарэння дастаўлены 57-гадовы сужыцель гаспадыні кватэры і яе 41-гадовы сын.
Прызначаныя экспертныя даследаванні, у тым ліку судова-медыцынская, пажарна-тэхнічная экспертызы; дапытаныя сведкі. Падазраваны затрыманы, з ім працуюць следчыя.
