«Твой стыль» закрываецца. Цяпер будзе Hrodna.life
Ад 10 кастрычніка 2016 года гродзенскае гарадское выданне «Твой стыль» ператвараецца ў Hrodna.life. Ужо пачаў працу цалкам новы сайт, больш дасканалы тэхнічна, які дазволіць яшчэ эфектыўней даносіць навіны і аўтарскія тэксты да аўдыторыі.
Новы сайт — больш сучасны і дасканалы тэхнічна, з кардынальна перапрацаванай навігацыяй. Ён выдатна выглядае як на дэсктопах, гэтак і на ўсіх мабільных прыладах.
«Hrodna.life — выданне пра жыццё горада і жыццё ў горадзе. Мы трымаем руку на пульсе Гродна і кожны дзень пішам пра важныя гарадскія падзеі ды тых, хто ў гэтым горадзе жыве.
Мы пішам пра дасягненні і праблемы Гродна і гродзенцаў, разважаем, як зрабіць горад лепшым, публікуем унікальныя гістарычныя матэрыялы, якіх няма больш ні ў кога.
На Hrodna.life мы збіраем свежыя навіны гарадскога жыцця толькі з правераных крыніц ды публікуем уласныя аўтарскія артыкулы, рэпартажы, інтэрв'ю, агляды і г.д.
Пад брэндам «Твой стыль» мы працавалі ў 2007—2016 гадах. Наш стары сайт-архіў будзе далей даступны для кожнага. Там, як і раней, можна будзе знайсці мноства тэкстаў, што не губляюць актуальнасці», — дзеліцца рэдактар сайта Аляксей Шота.
