Улады Тайланда назвалі «нестабільным» здароўе 88-гадовага караля
Прадстаўнік каралеўскага двара Тайланда ацаніў стан здароўя караля Пуміпона Адульядэта як нестабільны. Як адзначаюць сусветныя СМІ, да гэтага ўлады краіны інфармавалі насельніцтва аб стане здароўя караля толькі ў выпадках, калі яно паляпшалася.
AP
Як адзначаецца, пасля падрыхтоўкі караля да працэдуры ачысткі крыві, неабходнай з-за праблем з ныркамі, у яго ўпаў крывяны ціск. Цяпер ён падключаны да апарата штучнай вентыляцыі лёгкіх.
88-гадовы Пуміпон Адульядэт у апошнія гады часта трапляў у бальніцу па розных прычынах. У апошнія месяцы ён не з'яўляўся на публіцы, а большую частку мінулага года правёў у шпіталі.
У пачатку месяца прадстаўнік каралеўскага двара паведамляў пра тое, што кароль прайшоў курс лячэння ад рэспіраторнага захворвання.
Пуміпон Адульядэт стаў каралём Тайланда ў 1946 годзе і знаходзіцца на троне даўжэй за усіх манархаў у гісторыі краіны. Жыхары Тайланда ўважліва сочаць за зводкамі пра стан яго здароўя, бо шмат хто лічыць яго сімвалам аб'яднання нацыі.
Часопіс Forbes у 2013 годзе ацэньваў асабістую фінансавую маёмасць Пуміпона Адульядэта ў 44 млрд даляраў, што рабіла яго адным з найбагацейшых манархаў у свеце. Значную частку яе ён траціў на развіццё сельскай гаспадаркі.