8 кастрычніка ў Мінску — «Рок за жыццё»: вялікі канцэрт супраць смяротнага пакарання
Мінск, клуб Re:Public (вул. Прытыцкага, 62 (ст.м. Кунцаўшчына)). Пачатак: 17.30.
Фестываль «Рок за жыццё», прымеркаваны да Сусветнага дня барацьбы супраць смяротнага пакарання, пройдзе ў Мінску. 8 кастрычніка на сцэну клуба Re:Public выйдуць беларускія гурты «Дай дарогу!», Re1ikt, «Мутнаевока», :B:N:, Sciana і «Тлушч», каб падтрымаць увядзенне мараторыя на вышэйшую меру ў Беларусі.
Сусветны дзень барацьбы супраць смяротнага пакарання адзначаецца 10 кастрычніка. Ён заснаваны Сусветнай кааліцыяй супраць смяротнага пакарання — аб'яднаннем прафсаюзаў, мясцовых і рэгіянальных органаў улады, юрыдычных асацыяцый, а таксама праваабарончых арганізацый з мэтай паўсюднай забароны на гэты від вышэйшай меры пакарання. Прыхільнікі руху выступаюць супраць смяротнага пакарання ва ўсіх выпадках без выключэння, незалежна ад характару злачынства, характарыстык злачынцы і спосабу, якім дзяржава пазбаўляе жыцця асуджанага. Смяротнае пакаранне парушае права на жыццё, абвешчанае ў Сусветнай дэкларацыі правоў чалавека.
Беларусь дагэтуль застаецца адзінай еўрапейскай краінай, якая прымяняе смяротнае пакаранне. Паводле звестак праваабаронцаў, за апошнія дваццаць гадоў у краіне пакарана больш за 400 чалавек.
5 кастрычніка распачынаецца традыцыйны Тыдзень супраць смяротнага пакарання, мерапрыемствы якога будуць праходзіць пад слоганам «Смяротнае пакаранне — незваротнае».
Квіткі на канцэрт 8 кастрычніка будуць каштаваць 5 рублёў — танцпол, 10 рублёў — месца за столікам, у дзень канцэрта 10 — танцпол, 15 — столікі. Набыць квіткі можна ў касах і на сайце білетнага аператара Kvitki.by.
Даведкі: +375 29 121 22 96.
