Аналіз МВФ: Па ўзроўні жыцця палякі перагналі грэкаў і здаганяюць партугальцаў
Агулам узровень жыцця заходнееўрапейцаў і ўсходнееўрапейцаў выраўноўваецца.
Польшча ўпершыню ў сучаснай гісторыі перагнала паводле ўзроўню жыцця краіну Заходняй Еўропы. У мінулым годзе даход на душу насельніцтва ў Грэцыі быў менш, чым у Польшчы. Аб гэтым піша выданне «Rzeczpospolita», спасылаючыся на дадзеныя МВФ.
Па дадзеных Міжнароднага валютнага фонду, пры ўліку рэальнай пакупніцкай здольнасці, у 2015 годзе даход на аднаго жыхара Грэцыі склаў 26 тыс. 449 дал., а даход на аднаго паляка быў на 6 даляраў вышэйшы. Па прагнозах МВФ, у наступным годзе гэтая розніца складзе 1,5 тыс. дал.
Выданне адзначае, што 12 гадоў таму, калі Польшча ўступала ў ЕС, ад Грэцыі яе аддзяляла цэлая бездань.
У той час даход на душу насельніцтва ў Грэцыі складаў 96% ад сярэдняга даходу па ўсёй Еўропе, тады як у Польшчы гэты паказчык быў на ўзроўні 49%.
Акрамя таго, па дадзеных МВФ, ужо у 2018 годзе па ўзроўні жыцця палякі абгоняць партугальцаў.
Паводле прагнозаў аналітыкаў, у Партугаліі даход на душу насельніцтва будзе складаць 30 тыс. 134 дал., а ў Польшчы — 30 тыс. 692 дал.