Шуневіч не выключае ў хуткім часе распачынання крымінальных спраў па беларусах, што ваююць за мяжой
У Беларусі ў найбліжэйшай будучыні магчыма завядзенне крымінальных спраў у дачыненні да беларускіх грамадзян, якія бралі ўдзел ва ўзброеных канфліктах за мяжой. Пра гэта паведаміў сёння журналістам міністр унутраных спраў Ігар Шуневіч.
«Такія прэцэдэнты, думаю, адбудуцца ў найбліжэйшай будучыні і атрымаюць судовы працяг», — сказаў Ігар Шуневіч. Пры гэтым ён удакладніў, што крымінальным пераследам такіх людзей займаецца Следчы камітэт, а міліцыя толькі збірае дадатковыя следчыя матэрыялы.
Міністр унутраных спраў адзначыў, што нядаўна прынятыя папраўкі ў заканадаўства, якія дазваляюць прыцягваць да адказнасці за ўдзел ва ўзброеных канфліктах за мяжой, а не толькі за наёмніцтва, павысяць ў будучыні ўзровень бяспекі для жыхароў Беларусі. На яго думку, удзельнікі баявых дзеянняў за мяжой нясуць патэнцыйную пагрозу для грамадзян.
«Я вывучыў біяграфіі. Многія з іх — вельмі экзальтаваныя асобы, якія маглі б у будучыні прынесці нам бяды», - сказаў кіраўнік МУС.