МЗС РФ абвінаваціў Румынію: Мы памятаем, на чыім баку ваявала румынская армія
Міністэрства замежных спраў РФ выступіла з чарговай порцыяй абвінавачванняў у спробах перагледзець гісторыю другой сусветнай вайны, на гэты раз — у дачыненні да Румыніі.
Адпаведны каментар афіцыйнага прадстаўніка МЗС Расіі Марыі Захаравай размешчаны на сайце ведамства.
Прычынай незадаволенасці МЗС РФ сталі «вельмі сціплыя» мерапрыемствы з нагоды Міжнароднага дня памяці ахвяраў Халакосту, арганізаваныя ў Бухарэсце.
Расійскія дыпламаты адзначаюць, што яны «суправаджаліся правядзеннем афарбаванай ў адкрыта антысавецкія і антырасейскія тоны рэзананснай выставы, прысвечанай дэпартацыі трансільванскіх немцаў у СССР у 1945 годзе. Галоўны акцэнт быў зроблены на асуджэнні «жорсткіх, бесчалавечных» дзеянняў «савецкіх акупацыйных войскаў» у дачыненні да бязвінных немцаў».
«Каму, як не цяперашняму прэзідэнту Румыніі — этнічнаму немцу Яханісу, ведаць гэтыя старонкі нядаўняга мінулага сваёй краіны», — іранізуе Захарава.
«І яшчэ. У дні гадавіны капітуляцыі гітлераўцаў пад Сталінградам мы добра памятаем, на чыім баку ваявала румынская армія», — завяршаецца афіцыйны каментар МЗС РФ.
