Арсеній Сівіцкі: З боку Анкары гэта вельмі жорсткі сігнал Крамлю. Таксама яшчэ адзін аргумент для праціўнікаў расійскай базы ў Беларусі
Дырэктар Цэнтра стратэгічных і знешнепалітычных даследаванняў, сябра Вайскова-навуковага таварыства Цэнтральнага дома афіцэраў Узброеных сілаў Рэспублікі Беларусь Арсеній Сівіцкі падзяліўся з «НН» сваім бачаннем інцыдэнту са збіццём расійскага СУ-24.
«Мне здаецца, што інцыдэнт не прывядзе да поўнамаштабнай вайны паміж Расіяй і Турцыяй. Але пры гэтым моцна падарваная рэпутацыя расійскага боку, імідж сірыйскай кампаніі, якую цяпер праводзіць Масква.
Чаму рэпутацыя падарваная? Бо Расія мусіць неяк адказаць на інцыдэнт, і адказаць жорстка. У сродках адказу Расія абмежаваная. Яна не можа абвесціць Турцыі вайну, бо наступствы ваенна-палітычныя для Расіі будуць вельмі сур’ёзнымі. Турцыя — член НАТА. Пры такім гіпатэтычным сцэнары Расія будзе ваяваць не з адной Турэччынай, а з усім НАТА.
А па-другое, паколькі вінаватым тут з’яўляецца расійскі бок, гэты самалёт каля 10 разоў парушыў паветраную прастору з Турцыяй. Гіпатэтычна, калі самалёт выкарыстоўваўся для таго, каб распачаць сур’ёзны канфлікт, то Расія змяняе статус і пераўтвараецца ў краіну-агрэсарку з усімі міжнароднымі прававымі наступствамі.
Варта чакаць даволі сур’ёзнага дыпламатычнага і эканамічнага прэсінгу Расіі ў дачыненні Турцыі. Але гэта дастаткова сур’ёзны сігнал Расіі, які дэманструе жаданне турэцкіх уладаў, каб Масква лічылася з пазіцыяй Турцыі ў сірыйскім канфлікце.
Гэты інцыдэнт можа быць выкарыстаны, каб узмацніць прысутнасць войскаў НАТА на тэрыторыі Турцыі, а таксама ва Усходняй Еўропе».
Таксама Сівіцкі падкрэслівае, што дадзены інцыдэнт — гэта яшчэ адзін аргумент для праціўнікаў расійскай вайсковай базы на тэрыторыі Беларусі.
«Парушэнне паветранай прасторы краін НАТА і ЕС з боку расейскіх ВПС стала нормай з пачатку ўкраінскага крызісу. Вось і навошта нам гэтыя праблемы патрэбныя?» — лічыць эксперт.
