Трэцяя «Мафія» перамесціцца ў 60-я ВІДЭА
Гульня выйдзе калі-небудзь у 2016 годзе.
На выставе Gamescom у Германіі была анансаваная трэцяя частка серыі відэагульняў Mafia, перадае IGN.
Гульня адыдзе ад «рамантычнага» вобразу гангстараў — з часоў Вялікай дэпрэсіі першай «Мафіі» гульня перамесціцца ў 1968 год.
Яе распрацуе Hangar 13, новая студыя выдаўца 2K Games. Хутчэй за ўсё, «Мафія-3» стане першай гульнёй кампаніі.
Галоўны герой новай гульні, чарнаскуры хлопец Лінкальн Клэй, сірата і ахвяра штодзённага расізму, вяртаецца з в’етнамскай вайны і не можа знайсці сваё месца ў жыцці. Ад рук італьянскай мафіі гіне яго «гангстарская сям’я», сам ён атрымлівае кулю ў галаву, але выжывае. Ён збірае новую банду і адваёўвае горад разам з лідарамі гаіцянскай і ірландскай мафіі ды італьянцам Віта Скалета, героем «Мафіі-2». Кожны з яго «лейтэнантаў» надае галоўнаму герою спецыяльныя здольнасці і бонусы, але могуць і здрадзіць, калі дзеянні героя іх не задаволяць.
Першы трэйлер не дае інфармацыі пра сам працэс гульні, але жанр «стралялкі з машынамі» хутчэй за ўсё захаваецца і ў «Мафіі-3». Гульня мае выйсці ў 2016 годзе (дакладныя даты не называюцца) на персанальных камп’ютарах, Playstation 4 і Xbox One.
***
Першая гульня серыі, Mafia: The City of Lost Heaven, была распрацаваная чэшскай студыяй Illusion Softworks і выйшла ў 2002 годзе. Яна набыла высокую папулярнасць праз кінематаграфічную падачу сюжэту і нячасты ў відэагульнях сусвет гангстарскай Амерыкі 1930-х, называлася галоўным канкурэнтам серыі Grand Theft Auto, ад якой узяла ўзор геймплэю. «Мафія-2» перамясцілася ў 40-я. Другая частка серыі, распрацаваная таксама чэхамі, мела значна меншую папулярнасць і сярэднія адзнакі крытыкаў ды гульцоў.
