Кватэры ў першым беларускім хмарачосе купілі пакуль толькі 30 чалавек
Расійская кампанія «Ітэра» пачала будаўніцтва першага беларускага хмарачоса, «Ветразя», яшчэ ў 2010 годзе. Тэрміны здачы дома неаднаразова пераносіліся, і жыхары атрымалі свае кватэры толькі сёлета.
Вышыня «Ветразя» — 134 метры разам са шпілем. Паводле інфармацыі забудоўшчыка, у доме 204 кватэры ў двух пад’ездах.
Аднак распрадаецца жыллё няхутка, вялікага попыту на кватэры няма. Як стала вядома «Нашай Ніве», нерухомасць у элітным доме купілі толькі… 30 чалавек.
Яшчэ каля 50 кватэр удалося прадаць кіпрскім афшорным фондам.
Рэшта павісла мёртвым грузам на балансе кампаній «ІтэраБелБуд» і «Мінск-Сіці».
У мінулым месяцы «Ітэра» сутыкнулася з дадатковымі праблемамі. Эканамічны суд Мінска арыштаваў дзве кватэры ў «Ветразі».
Атрымаць каментар кампаніі не ўдалося, ніводзін тэлефон не адказвае.