«Я зараз вас буду пазбаўляць здароўя»: на адыёзнага дэпутата Мілонава напалі ў Пецярбургу
На дэпутата заканадаўчага сходу Санкт-Пецярбурга Віталя Мілонава напалі ў цэнтры горада. У завулку Антоненкі да Мілонава і яго памочніка падышоў малады чалавек, зняў куртку і са словамі «цяпер я вас буду пазбаўляць здароўя» пачаў душыць дэпутата. На дапамогу падаспеў нарад.
«Так, малады чалавек паспрабаваў зрабіць пэўныя дзеянні ў мой бок, але гнуткае цела было перахоплена сталёвай рукой», сказаў Мілонаў.
Па словах Мілонава, пагрозу ён рэальна не ўспрымаў: «Нас было трое мужыкоў дужай камплекцыі, а ён худзенькі. Маглі і па лбе яму даць, але гэта было б няправільна. Мне здаецца, яго душэўны стан не ў поўным парадку».
Па дадзеных паліцыі, 20-гадовы малады чалавек дастаўлены ў аддзяленне. Складзены пратакол аб адміністрацыйным правапарушэнні па артыкуле «Дробнае хуліганства».
Дэпупат Мілонаў вядомы сваімі дзіўнымі ініцыятывамі. У лютым 2014 г. ён прапанаваў забараніць канцэрты ўкраінскага гурту «Океан Ельзи» (у выніку канцэрты ў Расіі былі адменены), а некалькі дзён таму прапанаваў забараніць уезд у Расію кіраўніку кампаніі Apple Ціму Куку, бо той гей і нясе тым самым небяспеку расіянам.
