Ekanamičnaja chronika
Supermarkiety ŭ Viciebsku
Brytanskaja kampanija “Willisden Industries Limited” maje zbudavać u Viciebsku dva handlovyja centry: na Novaaršanskaj šašy ŭ rajonie telezavodu — universam; u rajonie pasiołku Bileva — hipermarkiet. Prajekty pakul abmiarkoŭvajucca. Brytanskaja kampanija planuje za 4—5 hadoŭ ukłaści ŭ raźvićcio roźničnaj handlovaj sietki Biełarusi 125 młn dalaraŭ. U vieraśni kampanija pačała budaŭnictva pieršaha supermarkietu (płoščaj 5,5 tys. kv.m) u Miensku, u rajonie aŭtavakzału “Ŭschodni”.
Taksoŭki musiać pažaŭcieć
Novy nacyjanalny standart STB 1389-2003 pačynaje dziejničać u Biełarusi z 1 listapada. Zhodna ź im, taksoŭki pavinny być pafarbavanyja tolki ŭ žoŭty koler ci choć by mieć žoŭty pas. Patrabavańni Dziaržstandartu, adpaviednyja mižnarodnym normam, pašyrajucca i na maršrutnyja taksoŭki. Tak, šyldačka z apisańniem maršrutu pavinna być peŭnaha farmatu i nie na papiery, a na ćviordym materyjale.
Nacyjanalizacyja strachavańnia transpartu
Abaviazkovaje strachavańnie transpartu budzie pieradadzienaje ŭ kampetencyju vyklučna dziaržaŭnych strachavych kampanijaŭ “Biełdziaržstrach”, “Biełeksimharant” i “Stravita”. Na ich dolu z novaha hodu budzie prypadać bolš za dva miljony transpartnych srodkaŭ, zarehistravanych u Biełarusi. Pastanovu Saŭminu asprečvajuć čatyry sotni pryvatnych strachavikoŭ.
Novy “Opel-Syhnum”
Na biełaruskim rynku źjavicca novy aŭtamabil — “Opel Signum”. Jon budzie prezentavany 19 kastryčnika ŭ aŭtasalonie “Opel”. U Eŭropie mašynu prezentavali ŭ krasaviku. Pry habarytach zvyčajnaha sedanu (daŭžynia 4 m 80 sm) jon maje vielmi vialikuju kołavuju bazu, što dadaje kamfortu ŭ časie jazdy. Upieršyniu ŭstanoŭlenaja ŭ novym “Opel Signum” systema “Travel Assistant” pieratvaraje miescy na zadnim siadzieńni ŭ ofis ci kinateatar. Kaštuje novy opel 16.800 eŭra.
Novaje ŭ spravie bałtyjskaha hazapravodu
Rasiejski kancern “Hazprom” šukaje partneraŭ dla budaŭnictva hazapravodu z Rasiei ŭ Zachodniuju Eŭropu pa dnie Bałtyjskaha mora. U minułuju piatnicu nakont hetaha prajektu, košt jakoha aceńvajecca ŭ 7 młrd dalaraŭ, vialisia pieramovy z pradstaŭnikami firmy “E.ON”. “Hazprom” paviedamiŭ taksama, što zacikaŭlenaść u budaŭnictvie novaha hazapravodu vykazvajuć jašče “Royal Dutch/Shell Group”, “Total SA”, “Wintershall” i “Fortum Oil”. Raźlikovaja mahutnaść hazapravodu — 30 młrd kuboŭ hazu ŭ hod.
SP; BiełaPAN
