Za što dajuć Nobela
Samym pavučalnym ź sioletnich Nobelaŭ padajecca premija ŭ fizycy.
Ledź nie paŭstahodździa adździalajuć pracu sp.Hinzburha ad vysokaje ŭznaharody, nahadvajučy, što słavutaja premija nia stolki investycyja i stymuł, kolki hanaravańnie. Jana dajecca laŭreatu nie dla taho, kab jon pracavaŭ lepiej, ale kab mieli stymuł dla starannaj pracy inšyja.
Premii za “śviežyja” ździajśnieńni (jak u hetym hodzie pa chimii) źjaŭlajucca čas ad času ŭ halinach, što raźvivajucca niezvyčajna imkliva. Na samuju blizkuju perspektyvu heta, biezumoŭna, bijalahičnyja navuki. Premija miru moža być vodhukam na nadzionnyja palityčnyja vykliki i navat — zhadajem chacia b Andreja Sacharava — investycyjaj, stymułam i srodkam.
Kali ž hladzieć uvohule — i asabliva heta tyčycca litaratury, — Nobeleŭskaja premija paznačaje svaim “znakam jakaści” toje, što ŭžo stała znakamitym na nacyjanalnym, a to j na hlabalnym uzroŭni. Inšy raz — hetak zdaryłasia ŭ svoj čas z Kiplinham — zorny čas laŭreata minaje zadoŭha da taho ščaślivaha momantu, kali jaho navažacca adznačyć švedzkija akademiki.
Spadziavańni na hanaravańnie Nobeleŭskaj premijaj biełarusa padajucca ŭ hetaj suviazi małacikavym zaniatkam. My, biełarusy (i navat z bratniaju Ruśsiu), budziem viedać hetaha čałavieka našmat raniej, čym jaho zaŭvažać u Osła ci Stakholmie. Važnaje nie jahonaje źjaŭleńnie jak takoje (nia vyklučana, što niejki naš, chutčej za ŭsio były, suajčyńnik zrobić niedzie ŭ zamiežnym — ci navat i ŭ našym — universytecie epachalnaje adkryćcio), a našaja padrychtavanaść da roli nacyi, jakaja vydaje nobeleŭskich laŭreataŭ. Pryznajmasia ščyra — kali b isnavała premija Nobela dla nacyjaŭ, biełarusy siońnia naŭrad ci pretendavali b na ŭklučeńnie ŭ short-list.
Poŭny varyjant artykułu hladzicie ŭ hazecie "Naša Niva".