Banki zadychajucca ad deficytu rubloŭ, staŭki mižbanku bjuć usie rekordy

Žorstkaja manietarnaja palityka Nacbanka pryviała da skačka stavak pa kredytach.

U suviazi ź pikam padatkovych vypłat u paniadziełak 22 kastryčnika siarednieŭzvažanaja staŭka AFN pa adnadzionnych mižbankaŭskich kredytach (MBK) vyrasła na 6,11% pracentnych punkta da 62,27% hadavych pry minimalnaj staŭcy 52%, maksimalnaj — 70% hadavych, paviedamlaje Ahienctva finansavych navin.

Učora kiraŭnica Nacyjanalnaha banka Nadzieja Jermakova paviedamiła, što apošnija try handlovyja siesii na BVFB Nacbank kuplaŭ valutu. Banki aktyŭna pradavali jaje, kab papoŭnić deficyt rublovaj masy.

Adnak hetych abjomaŭ vidavočna akazałasia zamała dla zadavalnieńnia popytu na rublovuju likvidnaść. Dziaržbanki praciahvajuć prasić rublovaj padtrymki ad Nacbanka. Miž tym Nacbank baicca, što vydzielenyja resursy ŭrešcie pojduć na kuplu valuty, što vykliča cisk na kurs.

Ahułam bieručy, takaja niervoznaść na finansavym rynku śviedčyć, što devalvacyjnyja i inflacyjnyja čakańni zastajucca vysokimi, pakul zachoŭvajecca niajasnaść z režymam pastavak nafty ŭ Biełaruś u 2013-m — asnoŭnaj krynicy valutnych dachodaŭ krainy.

Sam fakt takoj staŭki — bolšaj za 50% — adlustroŭvaje acenki biznesam i finansistami mahčymaści padzieńnia rubla.

Alaksandr Łukašenka ŭ paniadziełak na sustrečy z kiraŭnicaj Nacbanka zaviaraŭ, što kurs nacyjanalnaj valuty ŭdasca ŭtrymać i devalvacyjny pravał 2011 hoda nie paŭtorycca.

«Zusim niadaŭna my kanstatavali fakt, što nam udałosia ŭ niejkaj stupieni pierałamać choć nievialikija, ale niehatyŭnyja tendencyi na valutnym rynku, źviazanyja pierš za ŭsio z čutkami i palitykaj».

Adnak vybranyja im dalej słovy prahučali dosyć dvuchsensoŭna: «My pavinny śviata prytrymlivacca taho kursu, jaki my paznačyli i abviaścili narodu.

Kali Nacyjanalny bank abviaščaje takuju ​​palityku, to jaje treba i trymacca». Reč u tym, što aficyjna Nacbank dekłaravaŭ, što kurs budzie vyznačacca stroha na rynkavych pryncypach, u zaležnaści ad popytu i prapanovy.

Siarhiej Hiezhała

Chočaš padzialicca važnaj infarmacyjaj
ananimna i kanfidencyjna? Pišycie redaktaru
«Našaj Nivy» ŭ TH