U paleskaj vioscy Pahost paŭstahodździa śpiavaje svaje pieśni hurt «Mižrečča»
Niadaŭna ŭ Hiermanii na ich kancertach hałasili deputaty Bundestahu.
Zabudź pra «Buranovskich babušiek». U paleskaj vioscy Pahost, viadomaj usiamu śvietu dziakujučy CNN, voś užo paŭstahodździa śpiavaje svaje pieśni etna-hurt «Mižrečča». Akramia taho, jany zachoŭvajuć aŭtentyčnyja abrady. A niadaŭna hurt zładziŭ paśpiachovaje turne pa Hiermanii, dzie na ich kancertach hałasili deputaty Bundestahu. Na zvarotnym šlachu my pierachapili babulek u Miensku – pakul jany dajuć intervju za prosta tak.
«Što ž vy nas tak niepryhoža kličacie – «babuli»? My dziaŭčatki, nie stareje ž duša! Što my, u apošniaj stadyi ŭžo?» — śmiajecca baba Kacia.Frontvumen i zasnavalnicy hurtu «Mižrečča» Kaciarynie Alaksiejeŭnie Pančeni — 71 hod. Najmaładziejšaj z «dziaŭčatak» krychu bolš za 30, najstarejšaj — 87. Ahułam u hurcie 12 žančyn i adzin harmanist. U ich repiertuary kala 200 narodnych piesień i jašče dobry tuzin abradaŭ, pra jakija my chiba što ŭ padručnikach čytali.
Kaliści za kaladavańnie adnu z budučych udzielnic «Mižrečča» vyhnali sa škoły. Krok ad apały da słavy raściahnuŭsia na paŭstahodździa — u 2004 hodzie abrad «Juraŭski karahod» uvajšoŭ u śpis suśvietnaj spadčyny JUNIESKA jak niemateryjalnaja kaštoŭnaść.A ŭ 2010 hodzie mienavita za aŭtentyku abradaŭ paleskaja vioska Pahost zaniała treciuju pazicyju ŭ śpisie «top-10 miescaŭ dla śviatkavańnia Kaladaŭ» pavodle viersii CNN, abyšoŭšy Ńju-Jork, Łondan i Sidniej. Darečy, «mižrečča» – heta nie pra Tyhr i Jeŭfrat, a pra Śćvihu i Prypiać.
Padrabiaznaści bijahrafii hurtu nam badziora raspaviadaje baba Kacia paśla vystupu ŭ mienskim Muziei historyi i kultury na fołk-feście «Zamykańnie ziamli». Miesca kamiernaje, čałaviek na 30, sam vystup — skaročany. Jak patłumačyli arhanizatary, paleskija zorki stamilisia padčas niamieckaha turne. Adnak z samich babak enierhija tak i bje — baba Mania, 85 hadoŭ, paśla kancerta praciahvaje tančyć — daj boža pieršakurśnicam Linhvistyčnaha. A pa babie Kacie nikoli nie skažaš, što jana pieraniesła dva insulty. «Hladzicie na mianie, nie ŭ kamieru!» – prosić babu Kaciu žurnalistka.
«Ja ŭ dzirku nie choču hladzieć! Hej, a ty kudy lezieš pad spadnicu?!» — pieraścierahaje babka videaapieratara, jaki sprabuje prymacavać joj mikrafon dzieści zzadu.
Mikrafony dla hurtu — reč niazvykłaja, vystupajuć jany zvyčajna bieź ich. Fanahramu nie vykarystoŭvajuć taksama, čym vyhodna adroźnivajucca ad bližejšych kankurentak.
«Buranaŭskija babuli» — papsa. Ich sapsavali. Našto pad fanahramu śpiavać, kali jość žyvy hołas? Našto anhlijskaja mova, kali jość svaja?» — uzrušana kaža baba Kacia. Vyśviatlajecca, što «Mižrečča» lohka pajechała b na «Jeŭrabačańnie», a pakul tudy nie kličuć — budzie jeździć u Bierlin.
Inicyjataram trypu ŭ Hiermaniju staŭ fatohraf Andrej Lankievič, jaki daŭno pracuje z paleskimi zorkami. A arhanizavali ŭsio biełaruska Alesia Biełanovič i viadomy amatar biełaruščyny niemiec Inha Petc. Dahetul babuli za miažoj nie byli i doŭha nie vieryli svajmu ščaściu. Kali stała zrazumieła, što heta nie žart — płakali ad radaści.
Aŭtentyčnych biełarusak sustrakaŭ deputat Bundestahu — usich abšukali napiaredadni sustrečy i ŭ bojkaj baby Kaci zabrali nožyčak. Deputat doŭha pytaŭ pra Łukašenku, a potym paklaŭsia, što asabista pryjedzie da Kaciaryny Alaksiejeŭny, kab pahladzieć na biełaruski narod. Jana abiacała čakać.
Kancerty adbylisia ŭ Bierlinie i Drezdenie. Vystup u carkvie Śviatoj Lizaviety ŭ Bierlinie musiŭ doŭžycca paŭtary hadziny, ale hurt nie adpuskali sa sceny ŭsie dźvie. U zale było čałaviek 300. Žančyn całavali i abdymali, inšyja hledačy navat płakali, niemcy burkali «hut» dy całavali ruki.
Bolej fotazdymkaŭ i praciah historyi — TUT.