Adkryty list dacenta Čarniakieviča prarektaru Ahijaviec
«Akramia samoha A. A. Vasilenki, u kabiniecie prysutničaŭ pradstaŭnik Kamiteta dziaržaŭnaj biaśpieki, jaki pradstaviŭsia jak «San Sanyč».
Pieršamu prarektaru
Hrodzienskaha dziaržaŭnaha
ŭniviersiteta imia Janki Kupały
Ahijaviec S. U.
Adkryty list
Pavažanaja Śviatłana Uładzimiraŭna!
U paniadziełak, 10 vieraśnia, ja byŭ terminova vyklikany pa telefonie načalnikam Centra kadravaj i pravavoj raboty HrDU A. A. Vasilenkam na razmovu. Pryčyny dla takoj sustrečy mnie pry hetym nie patłumačyli. Akramia samoha A. A. Vasilenki, u kabiniecie prysutničali kiraŭnik adździeła biaśpieki ŭniviersiteta S. A. Rybčanka i pradstaŭnik Kamiteta dziaržaŭnaj biaśpieki, jaki pradstaviŭsia jak «San Sanyč». Zusim niečakana asnoŭnaj temaj sustrečy staŭ moj udzieł u pracy aŭtarskaha kalektyva pa vydańni padručnika «Hrodnaznaŭstva». Sama hutarka pa formie chutčej nahadvała dopyt i nie mieła, na moj pohlad, pramoha dačynieńnia da maich prafiesijnych abaviazkaŭ. Na majo pytańnie adnosna pryčyny takoj pavyšanaj cikavaści da knihi, jakaja pierad hetym užo dvojčy vychodziła navat u vydaviectvie samoha ŭniviersiteta, adkazu atrymana nie było. Takim samym čynam byli praihnaravanyja i maje šmatrazovyja nahadvańni adnosna nieabchodnaści praviadzieńnia mnoju lekcyi, u vyniku čaho ja nie zdoleŭ svoječasova patrapić na zaniatki ŭ korpus fakulteta psichałohii.
Jakoje ž było majo ździŭleńnie, kali litaralna praz dva dni paśla zhadanaj razmovy ŭ tym ža samym kabiniecie, u prysutnaści A. A. Vasilenki i S. A. Rybčanki mnie pradstavili dla aznajamleńnia DVA (!) akty ab majoj adsutnaści na pracoŭnym miescy padčas zaniatkaŭ. U pieršym vypadku ja zatrymaŭsia chvilin na piać u dekanacie fakulteta matematyki i infarmatyki, udakładniajučy raskład zaniatkaŭ, a ŭ druhim zatrymka składała jašče mienšy čas, prytym ja sam paprasiŭ studentaŭ krychu pačakać, majučy nieabchodnaść pryniać leki (u aktach terminy dadzienych spaźnieńniaŭ vyraśli adpaviedna da dziesiaci i piaci chvilin). Takim čynam, dźviuch papierak, padpisanych asobami, jakija napiaredadni faktyčna sarvali mnie zaniatak, chapiła dla taho, kab ja atrymaŭ zaŭvahu (pieršuju za adzinaccać hadoŭ pracy) i byŭ zvolnieny.
Z Hrodzienskim univiersitetam mianie źviazvajuć amal dvaccać hadoŭ vučoby i pracy. Tut taksama vučyŭsia i pracavaŭ moj baćka. Liču, što ja nikoli nie davaŭ nahody dla taho, kab uźnikali sumnievy ŭ maim prafiesijanaliźmie. Chvilina zatrymki na lekcyju napiaredadni PIACI paraŭ zapar tymi ludźmi, jakija sami kaliści vykładali, naŭrad ci budzie razhladacca ŭ jakaści niejkaha złačynstva.
Atrymlivajecca, što adzinaj pryčynaj taho, što zdaryłasia, źjaŭlajecca vychad knihi pa historyi Hrodna. Mahu jašče raz padkreślić, što mnie nie soramna za svaju pracu. Viedaju, što Vy z samaha pačatku byli ŭ kursie ŭsioj spravy i liču svajo zvalnieńnie prajavaj absurdu, jaki vynikaje z farmalizmu i słužbovaha impetu asobnych słužbovych asob, vartaha inšaha ŭžyvańnia.
Ščyra raźličvaju na pierahlad rašeńnia i admienu zroblenaj mnie zaŭvahi.
Z pavahaj,
Dacent kafiedry ekanamičnaj teoryi HrDU, kandydat histaryčnych navuk
Čarniakievič Andrej Mikałajevič
21.09.2012