Pradmieści stalicy: Kałodziščy. Cyhanski ahraharadok pad Minskam

Blizkaść da Minska i naładžanaje transpartnaje złučeńnie robiać Kałodziščy adnym z papularnych pryharadaŭ stalicy.

Tut žyvie kala dvaccaci tysiač čałaviek — jak u nievialikim rajonie. Pobač biełaruskija miljaniery Anatol Tarnaŭski i Juryj Čyž źbirajucca pabudavać faktyčna novy horad jašče na 200 tysiač biełarusaŭ, što pavysić u canie kałodziščanskija damy. Kali ich idei buduć realizavanyja, heta daść vydatnyja pierśpiektyvy dla miascovaha drobnaha biznesu, jaki pakul moža atrymać lhotnyja kredyty dla viaskoŭcaŭ na raźvićcio pradprymalnictva.

Uražańnie psujuć nieraźvitaja infrastruktura i niehatyŭny imidž kryminalnaha pasiołka.

Hod tamu Kałodziščy aficyjna stali «ahraharadkom», adnak heta pakul nie pryniesła nijakaha plonu. Zrešty, pra ŭsio pa paradku.

Biaźmiežnyja Kałodziščy

Ad kraju Kałodziščaŭ da centra Minska ŭsiaho 15 chvilin na mašynie.

Tyja ž, chto karystajecca hramadskim transpartam, za hety čas paśpiavajuć dajechać na aŭtobusie da kancavoj stancyi mietro. Zrešty, stolki ž traciać na darohu žychary mnohich spalnych rajonaŭ u miežach horada. Pryharadnyja aŭtobusy, maršrutki, elektryčki — u Kałodziščach jość hramadski transpart na luby hust. Mnohija abirajuć mienavita jaho, bo darohi ŭ pasiołku, miakka kažučy, niajakasnyja.

Skazać, dzie pačynajucca i dzie skančajucca Kałodziščy, niemahčyma.

Mała taho, što čyhunka razrazaje ahraharadok na dźvie častki, faktyčna izalavanyja adna ad adnoj, dyk jašče ŭ jaho skład uvachodziać niekalki katedžnych pasiołkaŭ, kožny ź jakich žyvie svaimi prablemami. Pakul u «Kałodziščach-Palihonie» i va «Utulnym kucie» ŭparta supraciŭlajucca mierkavanamu budaŭnictvu mikrarajona Juryja Čyža, u paŭnočnych Kałodziščach pra heta zmahańnie mnohija navat i nie čuli.

Na poŭnačy, kala samaj trasy Minsk-Maskva, aburanyja dolščyki patrabujuć chutčej vydać im kvatery, a ŭ centry pasiołka žychary nie adrazu ŭzhadvajuć, dzie budujucca hetyja harotnyja šmatpaviarchoviki.

Čałavieku, jaki zabłukaŭ na vulicach Kałodziščaŭ, treba budzie mocna pastaracca, kab pačuć paradu, jak jamu znajści patrebnuju darohu.

Niastrašnyja cyhany

Prablemy, jakija jašče niadaŭna abjadnoŭvali ŭsich žycharoŭ Kałodziščaŭ, a ciapier pałochajuć tych, chto źbirajecca pierajechać u pasiołak, — kryminał, narkotyki i cyhanskaja mienšaść.

Pryharad spradvieku ličyŭsia rassadnikam zła pad bokam u Minska. Jašče hadoŭ 10–15 tamu kryminalnyja zvodki strakacieli trahičnymi paviedamleńniami z Kałodziščaŭ. Ciapier situacyja častkova źmianiłasia, choć naviny pra źniščanyja narkałabaratoryi i zatrymanych narkakurjeraŭ sustrakajucca dahetul.

Žychary Kałodziščaŭ kažuć, što kožny čaćviorty žychar pasiołka — cyhan. Ale prablem ź imi niašmat.

Pra ŭpłyŭ hetaj nacyjanalnaj mienšaści na pasiołak nahadvajuć chiba što vieličnyja majontki baronaŭ dy aściarožnyja słovy miascovych pradprymalnikaŭ: maŭlaŭ, adkryć tut biznes atrymajecca daloka nie ŭ kožnaha. Peŭny pijetet biełarusy pry hetym zachoŭvajuć. Cyhan, jaki pradavaŭ kavuny na centralnym skryžavańni horada, adyšoŭ u adzin z susiednich damoŭ papić vady, pakinuŭšy biez nahladu i tavar, i hrošy. Za dziesiać chvilin, pakul jaho nie było, nivodny ź dziasiatka ludziej na darozie nie ryzyknuŭ navat padyści da pryłaŭka.

Adsutnaja infrastruktura

Bazarčyk, kijoski na prypynkach i praduktovyja kramki — voś i ŭvieś nabor spažyvieckaj infrastruktury Kałodziščaŭ.

U hipiermarkiety miascovyja žychary jeździać u Minsk. Zrešty, jak i ŭ mnohija inšyja ŭstanovy.

Uziać chacia b palikliniku. Niepasredna ŭ Kałodziščach možna znajści terapieŭta, stamatołaha i hiniekołaha. Inačaj treba brać tałončyk u palikliniku ŭ Baraŭlanach, pierapoŭnienuju svaimi pacyjentami. Daroha datul — jak minimum 15 kiłamietraŭ u adzin bok na mašynie ci hramadski transpart ź pierasadkami.

Dva sadki i škoła taksama nie mohuć pryniać usich achvotnych. Zrešty, mnohija baćki sami nie chočuć addavać siudy dziaciej, kab tyja nie vučylisia razam z cyhanami, i tamu hatovyja štodnia vazić ich u minskija škoły i himnazii.

Darečy, niekalki hadoŭ tamu čynoŭniki razhladali mahčymaść pabudavać u Kałodziščach pieršuju ŭ krainie cyhanskuju škołu, ale ideju nie padtrymała sama nacyjanalnaja mienšaść.

Niekalki adździaleńniaŭ bankaŭ, paštovyja adździaleńni, Dom kultury, dźvie biblijateki — jakaja-nijakaja infrastruktura ŭ Kałodziščach usio ž jość, ale patrebam žycharoŭ jana, vidavočna, nie adpaviadaje.

Jak stać kałodziščancam?

Kali raniej Kałodziščy ličylisia biaskrajnimi abšarami chaatyčna raskidanych katedžaŭ i leciščaŭ, to ciapier u pasiołku nadzvyčaj aktyŭna viadziecca šmatpaviarchovaje budaŭnictva.

Svaje žyllovyja kaapieratyvy sfarmavali Nacyjanalny Alimpijski kamitet, Ministerstva abarony, Ministerstva ŭnutranych spravaŭ. Trapić u hetyja damy prostamu śmiarotnamu składana, ale znajści adzinkavyja prapanovy ŭ hetych damach možna. Ci źviarnucca da dolevaha budaŭnictva.

* * *

Ceny na nieruchomaść u Kałodziščach

Kvadratny mietr u kałodziščanskich navabudach kaštuje krychu mienš za psichałahičnuju miažu ŭ tysiaču dalaraŭ — kala $900–950. Heta na čverć tańniej, čym u Minsku. A voś dyjapazon cenaŭ na hatovyja damy nadzvyčaj šyroki. Katedžy mohuć kaštavać ad $50 tysiač da paŭmiljona dalaraŭ.

Jahor Marcinovič

Chočaš padzialicca važnaj infarmacyjaj
ananimna i kanfidencyjna? Pišycie redaktaru
«Našaj Nivy» ŭ TH