Centrabanki Biełarusi i Rasii abmierkavali ŭ Połacku palityku valutnaha kursu

Aktualnyja pytańni dvuchbakovaha supracoŭnictva razhledžany na čarhovym, 36-m, pasiadžeńni Mižbankaŭskaha valutnaha savieta centralnych bankaŭ Biełarusi i Rasii.

Sustreča adbyłasia 22 červienia ŭ Połacku (Viciebskaja vobłaść) z udziełam staršyni praŭleńnia Nacyjanalnaha banka Biełarusi Nadziei Jermakovaj, staršyni Banka Rasii Siarhieja Ihnaćjeva, inšych pradstaŭnikoŭ centralnych bankaŭ dźviuch krain.

Jak paviedamlaje ŭpraŭleńnie infarmacyi Nacbanka, udzielniki pasiadžeńnia praanalizavali najaŭnuju ekanamičnuju situacyju i chod realizacyi asnoŭnych kirunkaŭ hrašova-kredytnaj palityki ŭ Biełarusi i Rasii ŭ 2012 hodzie, uklučajučy palityku valutnaha kursu, a taksama vyniki pracy biełaruskaj i rasijskaj bankaŭskich sistem letaś.

Na sustrečy razmova išła pra dynamiku mižnarodnych reziervaŭ i likvidnaści ŭ zamiežnaj valucie Biełarusi i Rasii na asnovie aznačeńniaŭ, što vykarystoŭvajucca ŭ miežach śpiecyjalnaha standartu raspaŭsiudžvańnia źviestak MVF, pra dvuchbakovy płaciežny bałans Biełarusi i Rasii i płaciežny bałans Sajuznaj dziaržavy.

Baki abmianialisia mierkavańniami ab chodzie pracy ŭ Biełarusi i Rasii pa realizacyi rekamiendacyj Bazielskaha kamiteta pa bankaŭskim nahladzie, ab supracoŭnictvie centralnych bankaŭ dźviuch krain z MVF i inšymi finansavymi arhanizacyjami, ab stanie pieramoŭnaha pracesu pa dałučeńni Biełarusi da SHA i ab inšych nadzionnych pytańniach.

Dasiahnuta damoŭlenaść ab praviadzieńni čarhovaha pasiadžeńnia Mižbankaŭskaha valutnaha savieta centralnych bankaŭ Biełarusi i Rasii ŭ vieraśni-kastryčniku 2012 hoda na terytoryi RF.

Alaksiej Areška, BiełaPAN

Chočaš padzialicca važnaj infarmacyjaj
ananimna i kanfidencyjna? Pišycie redaktaru
«Našaj Nivy» ŭ TH