Žychar Bresta zrabiŭ z katedža 6-kvaterny dom, a potym pradaŭ u im kvatery
Adna z novabudoŭlaŭ u Breście stała pradmietam suda.
U kancy 2008 hoda adna hramadzianka z pryharadu atrymała dazvoł na budaŭnictva dvuchpaviarchovaha žyłoha doma z hazasilikatnych błokaŭ z haspadarčymi pabudovami. Nieŭzabavie jana vydała svajmu plamieńniku davieranaść na viadzieńnie budaŭničych pracaŭ. Plamieńnik, Viačasłaŭ Zinovič, uziaŭsia za spravu. I całkam paśpiachova.
Ź listapada 2008 pa červień 2011 hramadzianin samavolna pabudavaŭ šaścikvaterny dvuchpaviarchovy mansardavy žyły dom biez papiaredniaha atrymańnia adpaviednych dakumientaŭ, uniasieńnia źmienaŭ u raspracavanuju prajektnuju dakumientacyju i prachodžańnia budaŭničaj ekśpiertyzy. Nie było taksama rašeńniaŭ miascovych vykanaŭčych i rasparadčych orhanaŭ ab prajektavańni i budaŭnictvie abjekta i atrymańnia dazvołu na vytvorčaść
Sud pačaŭ administracyjny praces, ale Zinovič adpiraŭsia. Jon śćviardžaŭ, što ŭsiaho tolki dapamahaŭ ciotcy ŭ budaŭnictvie. U 2009 hodzie pa davieranaści kuplaŭ budmateryjały. Kali i kim viałosia budaŭnictva, jamu nie viadoma, tamu što sa studzienia pa vierasień 2010 hoda jon znachodziŭsia ŭ śledčym izalatary. Kali vyzvaliŭsia, strachary ŭžo kryli dach. A potym u ciotki skončylisia hrošy, jana pradała ziamielny ŭčastak i niezavieršanaje budaŭnictva častki chaty, i ciapier ceły kalektyŭ ułaśnikaŭ składaje tavarystva.
«Viersija» nie spracavała. Sud Maskoŭskaha rajona Bresta vyśvietliŭ, što zamiest adnakvaternaha žyłoha doma faktyčna pabudavany šaścikvaterny, jaki byŭ paśla zakansiervavany i raspradadzieny hramadzianam u vyhladzie dolaŭ, pamier jakich adpaviadaje płoščy adna-, dvuch- i trochpakajovych kvater. I ŭsio heta zrabiŭ Viačasłaŭ Zinovič.
Jak atrymałasia ŭ miežach adviedzienaha ŭčastka i pierymietra ścien z adnaho katedža zrabić 6 kvater — asobnaja historyja. Dapuščanyja šmatlikija parušeńni, vykarystanyja «niepratakolnyja» budmateryjały. Jość i jašče adno. Praktyčna zadniaj dataj, užo ŭ listapadzie 2011 hoda, harvykankam dazvoliŭ tavarystvu raspracoŭku dakumientacyi na budaŭnictva šaścikvaternaha žyłoha doma na bazie zakansiervavanaha adnakvaternaha.
Chitramu hramadzianinu zaraz daviadziecca zapłacić štraf u pamiery 20 bazavych vieličyń. Ale što dla biznesoŭca narmalnaha maštabu takoje pakarańnie? Kali čysta hipatetyčna ŭziać košt kvadratnaha mietra ŭ hetym domie za 600 u.a. i dapuścić, što budaŭnik pradaŭ dolščykam kvatery, čysty prybytak jaho moža skłaści dzieści 120 tys. dalaraŭ.
