Aleh Rudakoŭ: Mnohija pačynajuć dystancyjanavacca ad nas

Staršynia Tavarystva Irkuckaj kultury imia Jana Čerskaha Aleh Rudakoŭ naviedaŭ siadzibu MHA «ZBS «Baćkaŭščyna». Jon raskazaŭ pra prablemy, ź jakimi sutyknułasia TBK paśla abvinavačvańnia ŭ ekstremiźmie aktyvista moładzievaha kłuba «Kryvičy» Alaksieja Kuchty.

— Spadar Aleh, akreślicie, kali łaska, jak vyrašajecca kanfliktnaja situacyja pamiž «Moładzievym kłubam «Kryvičy» i Śledčym kamitetam Rasijskaj Fiederacyi pa Irkuckaj vobłaści?

— Na siońnia kryminalnaja sprava ab ekstremiźmie praciahvajecca, abvinavačvańni nie źniatyja.

Da nas dachodziać źviestki, što śledčyja orhany razmaŭlajuć z čynoŭnikami, dziaržaŭnymi orhanami, z hramadskimi arhanizacyjami, naprykład, z savietami vieteranaŭ i raspaŭsiudžvajuć siarod ich infarmacyju, jakaja nas niezasłužana ačarniaje. Jak vynik, mnohija pačynajuć dystancyjanavacca ad nas,

tyja ž saviety vieteranaŭ, naprykład, choć my i dla ich pravodzili roznyja mierapryjemstvy, daryli vieteranam pamiatnyja miedali da 60- i 65-hodździa vyzvaleńnia Respubliki Biełaruś ad niamiecka-fašysckich zachopnikaŭ. Adnak niekatoryja saviety vieteranaŭ (naprykład, Saviet vieteranaŭ Śviardłoŭskaj akruhi) spahadajuć nam i pišuć listy ŭ našu padtrymku.

My adčuvajem, što mnohija arhanizacyi ciapier trymajuć adlehłaść. 8 traŭnia Saviet vieteranaŭ Afhanistana z moładzievymi arhanizacyjami Irkucka ładziŭ šeście z pachodniami ŭ honar zakančeńnia Vialikaj Ajčynnaj vajny. Byli zaprošanyja mnohija nacyjanalnyja supołki: tatarskaja, litoŭskaja, ukrainskaja i inšyja.

Ale nas nie zaprasili, i kali ich spytali, to jany prosta adkazali, što biełarusaŭ im na šeści nie treba.

Jašče prykład. Ja pavinien byŭ vystupać na kanfierencyi, dzie abłasnaja administracyja źbiraje pradstaŭnikoŭ municypalnaj ułady. U mianie byŭ padrychtavany dakład pa ŭzajemadziejańni nacyjanalna-kulturnych abjadnańniaŭ z municypalnymi strukturami. U nas 12 zarehistravanych adździaleńniaŭ pa Irkuckaj vobłaści, my majem stanoŭčy vopyt pa takim uzajemadziejańni, i ja mieŭ pra što raskazać. Ale mianie vykraślili z dakładčykaŭ, tamu što, maŭlaŭ, kiraŭnictva ličyć mianie «ekstremistam».

Ale my, tym nie mienš, praciahvajem aktyŭna pracavać, jość arhanizacyi, jakija nie bajacca praciahvać z nami kantakt. Voś nie tak daŭno my brali ŭdzieł u śviacie, pryśviečanym Šekśpiru, jakoje arhanizavaŭ Linhvistyčny univiersitet h. Irkucka. Ja čytaŭ tvory Šekśpira ŭ pierakładzie na biełaruskuju movu. 18 traŭnia my ŭdzielničali ŭ «Nočy muziejaŭ». Nam dali cełuju hadzinu dla prezientacyi našaj supołki, vystupali hurty, prajšoŭ majstar-kłas pa biełaruskich tancach. Zaŭtra budzie adkryćcio vystavy «Biełaruskaje ramiastvo žyvie ŭ Prybajkalli». To bok dystancujucca nie ŭsie, ale niekatoryja bajacca čutak. I, niesumnieŭna, dziejańniami Śledčaha kamitetu aŭtarytet naš mocna padarvany.

— Jak vy bačycie raźvićcio hetaj kanfliktnaj situacyi?

— Što budzie dalej — nieviadoma, i pytańnie hetaje chutčej da Śledčaha kamitetu. My, zrazumieła, napisali im list. Taksama my praviali akcyju «Dobraachvotny śviedka»: zvyčajnyja ludzi, abjadnańni pisali listy ŭ našu padtrymku. My budziem źviartacca da Śledčaha kamitetu, kab jany vypuścili novy pres-reliz, jaki b papraviŭ našuju reputacyju. Kali jany admoviacca publikavać hety pres-reliz, my budziem źviartacca ŭ sud. My ŭpeŭnienyja, što nievinavatyja ŭ tym, u čym nas abvinavačvajuć.

— Spadar Aleh, jak vy možacie prakamientavać padaču infarmacyi ŭ ŚMI pra hety kanflikt?

— 17 krasavika Śledčy kamitet vydaŭ pres-reliz, dzie ŭskosna abvinavačvaje nas u ekstremiźmie. I ŚMI — nie tolki irkuckija, ale i zamiežnyja taksama — padali heta jak «smažany fakt». Jany vykarystoŭvali kryklivyja zahałoŭki kštałtu «Biełaruskaja supołka abvinavačanaja ŭ ekstremiźmie», «Hłava biełaruskaj supołki aryštavany za ekstremizm», padajučy infarmacyju ŭ skažonym vyhladzie, z adnabakovaj interpretacyjaj. Byli i bolš-mienš abjektyŭnyja ŚMI, jakija, prynamsi, pytali i našaje mierkavańnie, ale było i šmat brudu, jaki vylivaŭsia na nas. Mnohija ludzi, jakija raniej z pavahaj stavilisia da nas, mahli zasumniavacca ŭ našaj nievinavataści, maŭlaŭ, «niama dymu biez ahniu»… Śledčy kamitet spracavaŭ jak žoŭtaja presa, jany paprostu ŭzarvali infarmacyjnuju bombu.

— U jakoj stupieni zaminaje ŭsia hetaja situacyja niepasrednaj dziejnaści vašaha tavarystva?

— Vielmi zaminaje. My vymušanyja admaŭlacca ad mnohich bujnych mierapryjemstvaŭ, naprykład, ad fiestyvalu «Hučy, homan biełaruski», ad II mižnarodnaj kanfierencyi, pryśviečanaj Stałypinskaj reformie, ad festu biełaruskaj kultury na Bajkale, jaki musiŭ prajści ŭ žniŭni… Bo ciapier ciažka pracavać sa sponsarami, my ŭžo nie možam raźličvać na abłasny abo haradski biudžet. My možam realizoŭvać na ŭłasnaj aktyŭnaści tolki prajekty z małym finansavańniem, pa bolš zatratnych mierapryjemstvach my ciapier abmiežavanyja. Kali my šukajem niejkija srodki na heta, nam faktyčna nie dajuć aficyjnych adkazaŭ, tolki niejkija adpiski.

Taksama iznoŭ paŭstała prablema z arendaj. 14 traŭnia my atrymali list z Kamiteta municypalnaj majomaści h. Irkucka, što damovu na arendu siadziby jany mohuć praciahnuć tolki na toj umovie, što z červienia my budziem płacić za jaje pa rynkavym košcie. A my nie zdolejem, u nas niama takich srodkaŭ, tamu heta pahražaje strataj pamiaškańnia.

Jano zajmaje 80 kv. m., u nas tam šmat ekspanataŭ, tam stanki, krosny, u nas tam i majsternia ramiesnaja, i muziej, i biblijateka, i redakcyja, i nievialikaja zała dla repietycyj. Biez pamiaškańnia niemahčyma pracavać, i pakul niajasna, što budzie z nami ŭ červieni. My napisali meru list, dzie prosim dazvolić nam zastacca ŭ siadzibie. My pišam, što zhodnyja na 6% bolš płacić, čym ciapier, bo rynkavy košt my nijak nie paciahniem. Ciapier čakajem adkazu. Takim čynam, my cierpim ad usioj hetaj situacyi vielmi mocna, ale, znoŭ padkreślu, my nie ličym siabie tut choć trochi vinavatymi, my ličym heta nieparazumieńniem, nieprafiesijnymi dziejańniami śledčych, jakija nie razabralisia ŭ situacyi.

Zbsb.by

Chočaš padzialicca važnaj infarmacyjaj
ananimna i kanfidencyjna? Pišycie redaktaru
«Našaj Nivy» ŭ TH