Achoŭniki Abamy pahareli na prastytutkach

Ahient amierykanskaj Sakretnaj Słužby zhańbiŭ Amieryku paśla viasiołaj nočy, jakaja skončyłasia sprečkaj z kałumbijskaj prastytutkaj pra košt, — dziaŭčyna chacieła vybić ź jaho dadatkova ekvivalent 47 dalaraŭ.

Adzin z adzinaccaci elitnych ahientaŭ, adpraŭlenych dla achovy prezidenta Abamy na Panamierykanskim samicie ŭ kałumbijskim horadzie Kartachiena, byŭ vykryty paśla taho jak jahonaja ledzi na adnu noč admoviłasia pakinuć hatelny pakoj uranku biez dadatkovaj apłaty.

Taja žančyna była adnoj z adzinaccaci prastytutak, vyklikanych u hatel u tuju noč, —

paviedamlaje hazieta «Ńju-Jork post», — i tolki ź joj adnoj razhareŭsia kanflikt u šykoŭnym hateli «Karybe», dzie spyniłasia amierykanskaja delehacyja.

Papiaredniaje sienackaje rasśledavańnie vyjaviła, što ahienty prybyli ŭ Kartachienu tydzień tamu i ŭvieś čas mocna pili.

Prastytucyja ŭ Kałumbija lehalnaja ŭ niekatorych «zonach talerancyi», tam jaje kantraluje palicyja. Pasłuhi prastytutki ŭ Kartachienie kaštujuć prykładna $47 dalaraŭ u ekvivalencie,

paviedamlaje kałumbijskaje telebačańnie.

Pavodle tamtejšaha zakona, prastytutka abaviazana pakinuć pakoj klijenta i zabrać svoj pašpart u recepcyi hatela da 7-j hadziny ranku.

Kali hetaha nie zdarajecca, administratar abaviazany vydalić jaje. Kali jon padniaŭsia ŭ numar, jon zastaŭ ahienta z žančynaj za vyśviatleńniem adnosinaŭ.

Choć ahienty nie parušyli zakonaŭ krainy pierabyvańnia, ale jany mocna parušyli praviły Sakretnaj Słužby.

Jany, zbolšaha, žanatyja, i suviaź z prastytutkaj robić ich abjektami šantažu. Skandał užo nazvali «samym mocnym» za ŭsiu historyju sakretnaj słužby.

Da taho ž, ZŠA stali abjektam kpinaŭ u Łacinskaj Amierycy.

Abama zajaviŭ, što, kali paviedamleńnie ab prastytutkach paćvierdzicca, ahientaŭ čakaje mocnaje pakarańnie. Usiaho pad padazreńnie trapili 11 ahientaŭ Sakretnaj Słužby i 5 vajskoŭcaŭ.

«Takija rečy nie zdarajucca adnojčy, kali jany nie adbyvalisia da hetaha», — zajaviŭ kanhresmen Dareł Isa. Sa słovaŭ krynic ahienctva Reuters, praca ahientaŭ nadzvyčaj ciažkaja, tamu čaściakom viečarami jany vypivajuć i rassłablajucca ŭ barach. Viečarynki najčaściej ładziać u tyja dni, kali «pieršy bort» z prezidentam pakidaje Vašynhton.

Čynoŭniki dadajuć, što siarod ahientaŭ doŭhi čas hulała prymaŭka, jakuju možna pierakłaści jak «sieŭ u mašynu — zdymaj piarścionak».

SH

Chočaš padzialicca važnaj infarmacyjaj
ananimna i kanfidencyjna? Pišycie redaktaru
«Našaj Nivy» ŭ TH