Čarhiniec choča pierapisać školnyja padručniki litaratury
Staršynia praŭładnaha Sajuza piśmieńnikaŭ hatovy zamianić prahramnyja teksty.
Staršynia praŭładanaha Sajuza piśmieńnikaŭ hatovy zamianić prahramnyja teksty.
U intervju haziecie «LiM» jon raskrytykavaŭ tvory sa školnych padručnikaŭ.
«Na źjeździe [Sajuza piśmieńnikaŭ u kastryčniku 2011] my nie abydziem takoje pytańnie, jak padrychtoŭka padručnikaŭ i dapamožnikaŭ pa litaratury i movie dla škoł, — zajaviŭ hienierał. —
Inšy raz układalniki ich prosta złoŭžyvajuć davieram hramadstva i sprabujuć ŭvieści takija tvory i ŭryŭki z tvoraŭ, jakija, skažam, nie adpaviadajuć duchu času, iduć nasupierak nacyjanalnaj idei našaj krainy, padryvajuć sapraŭdny duch patryjatyzmu,
źmiešvajuć paniaćci praŭdy i niapraŭdy, dabra i zła, talentu i šarahovaści. I darečy, dziejnaściu takoj zajmajucca ž hramatnyja ludzi. Moža, jany nie razumiejuć da kanca taho, što robiać? Treba, peŭna, kalehijalna abmiarkoŭvać takija dapamožniki i padručniki z zaprašeńniem aŭtaraŭ».
Składańniem školnych prahram, na asnovie jakich vydajucca padručniki, zajmajucca śpiecyjalisty Nacyjanalnaha instytuta adukacyi.
U 2007 hodzie ŭžo adbyŭsia pierahlad školnaj prahramy pa biełaruskaj litaratury. Tady sa śpisu aŭtaraŭ dla vyvučeńnia i pazakłasnaha čytańnia byli vykinuty Śviatłana Aleksijevič, Michaś Skobła, Uładzimir Niaklajeŭ i inšych. Adkaznaść na siabie ŭziaŭ Alaksandr Łukašenka.
«Sa školnych prahram pa majoj inicyjatyvie byli vykinutyja ŭsie nacyjanalisty, tak zvanyja piśmieńniki».
A ŭžo praz hod hienierał Čarhiniec «zarezaŭ» vychad za dziaržsrodki šerahu vydańniaŭ, padrychtavanych Instytutam litaratury AN. «Hrupa ludziej, što niehatyŭna staviacca da dziaržavy i ŭłady, prapanavała ŭnieści ŭ pieralik sacyjalna-značnaj litaratury 6-ci ci 8-mi tomnik Łarysy Hienijuš, fašysckaha prychvaśnia Arsieńnievu i siamitomnik Zakońnikava, u jakoha i dvuch tamoŭ nie naźbirajecca. Kali tolki ŭziać jaho bolš za 120 publikacyj u apazicyjnaj presie, skiravanych na padryŭ ułady, dziaržavy, suprać sacyjalnych padvalin dziaržavy».
U siońniašniaj prahramie pa biełaruskaj litaratury jość tvory nie raz krytykavanych Čarhincom Buraŭkina, Baradulina, Hileviča, navat Zakońnikava. I Volhi Ipatavaj z Uładzimiram Arłovym, chaj sabie i ŭ śpisie pazakłasnaha albo samastojnaha čytańnia. A voś tvoraŭ samoha Mikałaja Čarhinca ŭ śpisie litaratury niama, choć pra jaho i ŭzhadvajuć na ŭrokach ruskaj litaratury ŭ temie «Ruskamoŭnaja litaratura Biełarusi».