Łukašenkaŭ «boinh» lacić pa duzie
Paśla Tehieranu na čarzie, imavierna, Tsvane. Znaŭcy, viedajecie, dzie heta?
Aficyjny Miensk manicca vybudavać deklaravanuju "vialikuju duhu" zamiežnaj palityki. Alaksandar Łukašenka palacieŭ ŭ Iran. Trochi raniej jon nazvaŭ hetu krainu "surjoznym punktam apory ŭ dalokim zamiežžy".
Paru tydniaŭ tamu ŭ Tehieranie haściavaŭ ministar zamiežnych spraŭ Martynaŭ. Rychtavaŭ vizyt. Kažuć, mienavita Martynaŭ hieneravaŭ kancepcyju "duhi".
Naviersie metafara vidavočna spadabałasia. Ciapier usim zrazumieła, što lotajem nie "tudy, dzie prymajuć", a zhodna ź vialikim hieapalityčnym planam.
Pra što buduć pieramaŭlacca ŭ Tehieranie dva kiraŭniki?
Analityk Andrej Fiodaraŭ zaznačaje: peŭna nie abydziecca biez enerhietyčnych pytańniaŭ. Ale naŭprostavyja pastaŭki nafty ź Iranu nierealnyja. Moža być skarystanaja chiba niejkaja zalikovaja schiema (padobnym čynam, naprykład, Ukraina atrymlivaje nibyta turkmienski haz), ale i heta prablematyčna.
Viadoma, što Miensk padtrymlivaje pretenzii Iranu na "mirny atam". Cikava, nakolki heta budzie akcentavacca padčas ciapierašniaha vizitu?
Na dumku Andreja Fiodarava, nadta hučnaja padtrymka biełaruskim kiraŭnikom jadravych ambicyjaŭ kalehi Achmadynežada moža vyklikać niezadavolenaść u Maskvie. Jaje i tak dziaŭbuć za paturańnie iranskamu režymu. Zaŭvažcie, učora rasiejski ministar Łaŭroŭ z peŭnymi ahavorkami zhadziŭsia na mahčymaść sankcyjaŭ suprać Tehieranu. Heta peŭnaja sastupka Zachadu.
Tak što Rasiei zaraz zusim niedarečy, kab chaŭruśnik (za jakoha dziaŭbuć jašče i asobna, praź niedemakratyzm režymu) piajaŭ dyfiramby iranskaj jadravaj prahramie.
A ŭvohule — ci nie atrymajecca ź "vialikaj duhi" vialiki blef? Na hetaje majo pytańnie Andrej Fiodaraŭ adkazvaje tak: padobnyja režymy, jakich z paŭtuzina na planecie nabirajecca, nasamreč hrupujucca i starajucca adzin adnaho padtrymlivać maralna. A voś atrymać ad henych chaŭrusaŭ značnyja ekanamičnyja dyvidendy Biełarusi budzie prablematyčna.
Va ŭsiakim razie, plany zdabyčy nafty ŭ Venesuele analityk Andrej Suzdalcaŭ biaźlitasna vyśmiejaŭ. Navat kali zrabić papraŭku na palemičny impet aŭtara, usio adno naprošvajecca vysnova, što zaakijanskaje Eldarada naŭrad ci vyratuje "biełaruski cud" pry suśvietnych koštach enierhanośbitaŭ.
Ź irancami naš handal na siońnia (prytym što siabroŭstva deklarujecca ŭžo nia pieršy hod), miakka kažučy, ścipły: $38,4 młn. za 2005 hod. Dla paraŭnańnia: abjom handlu ź Niamieččynaj tolki za studzień — vierasień sioleta skłaŭ blizu $1,8 młrd.
Vialikaje pytańnie, ci pojduć u nas iranskija "Samandy". "Fordu" na tych samych płoščach u Abčaku nie pašenciła. "Samandy" ž, kali chto nia viedaje, robiacca pavodle ŭzoru "Pežo-405". Kopija zaŭždy horšaja za aryhinał. Na dobry ład, chaj by ŭ krainu naŭprost prychodzili zachodnija firmy. Ale ž — "nia ŭ hetym žyćci"!..
Tym časam čakajma novych palotaŭ "pa duzie". Na čarzie, imavierna, stalica PAR. Da viedama: u byłoj Pretoryi ciapier aŭtentyčnaja tuziemnaja nazva — Tsvane.
