«Vonehut byŭ by ŭściešany»
U Minsku prezientavali raman Kurta Vonehuta «Bojnia № 5, abo Kryžovy pachod dzietak» pa-biełarusku.
U Minsku prezientavali raman Kurta Vonehuta «Bojnia № 5, abo Kryžovy pachod dzietak» pa-biełarusku.
Prezientacyja ŭ minskaj kniharni «Ŭ» pačałasia z malitvy. Toj samaj znakamitaj vonehutaŭskaj malitvy:
Boža! Daj mnie łahody
pryniać toje, što
ja nie mahu źmianić,
mužnaści
źmianić toje, što mahu,
i mudraści —
zaŭsiody adroźnić pieršaje ad druhoha.
Pramaŭlajučy jaje, aŭtar pierakładu Pavieł Kaściukievič zaŭvažna chvalavaŭsia. Zrešty, toje chvalavańnie pajšło na karyść — u nievialikaj zale kniharni, dzie siońnia ŭviečary nie było kudy ŭpaści jabłyku, adrazu pacišeła. Pierakładčyk adrazu papiaredziŭ, što viečaryna pryśviečanaja nie tolki pierakładzienamu ramanu, ale amierykanskaj litaratury ŭ cełym.
Paśla prahladu frahmienta mastackaha filma Džordža Roja Chiła «Bojnia №5», słova ŭziała staršynia Rady Zhurtavańnia biełarusaŭ śvietu «Baćkaŭščyna» Nina Šydłoŭskaja. Jana raskazała, što pierakład Vonehuta zapačatkavaŭ admysłova zasnavanuju ZBS padsieryju «Pierakłady» sieryi «Biblijateka Baćkaŭščyny». Jana pryhadała słovy byłoha pasła Izraila ŭ Biełarusi Ziejeva Bien-Arje, napisanyja ŭ pradmovie da knihi «Čałaviek, jaki skraŭ Ścianu Płaču», pierakładzienaj usio tym ža Kaściukievičam. Pasoł pisaŭ, što praŭdzivy dyjałoh pamiž narodami moža być tolki na nacyjanalnych movach. Hetyja słovy całkam spraviadlivyja i ŭ dačynieńni da novaj pracy Paŭła, adznačyła Nina Šydłoŭskaja.
Piśmieńnik Uładzimir Arłoŭ pryhadaŭ svaje studenckija hady. Niejak partyjnaja kamisija ŭniviersiteta zapytała, što jon čytaje. Pačuŭšy ŭ adkaz proźviščy Azimava, Bredbiery dy Vonehuta, jamu nastojliva paraili padpisacca na kamsamolskija vydańni. «Ja rady, što praz hady maju mahčymaść pračytać «Bojniu» pa-biełarusku. Dumaju, kali b aŭtar viedaŭ našu movu i moh pračytać pierakład, jon byŭ by im uściešany. I paślamovaj da ramana taksama». Arłoŭ pračytaŭ kolki novych vieršaŭ i sastupiŭ miesca pierakładčyku ramana Čaka Pałanika «Bajcoŭski kłub» Sieržuku Miadźviedzievu. Toj začytaŭ uryvak z ramana, parazvažaŭ nad fienomienam tvorčaści Pałanika i pieradaŭ estafietu pierakładčycy Juli Cimafiejevaj. U jaje vykanańni hości prezientacyi pačuli kolki vieršaŭ paeta-bitnika Alena Hinźbierha, dramaturha Teniesi Uiljamsa i maładoha amierykanskaha paeta Mećju Dzikmana pa-biełarusku. Potym na impravizavanaj scenie słemiŭ paet Vital Ryžkoŭ. «Siońnia prahučać vieršy majho ŭlubionaha paeta Tejłara Meli», — paabiacaŭ Vital. I pačałosia: «Što robiać nastaŭniki...»
Słem skončyŭsia, i haspadar viečaru prapanavaŭ viarnucca da «Bojni №5». Pavieł začytaŭ paślamovu da pierakładu i pryhadaŭ pra znakamituju malitvu Vonehuta. «Jość roznyja viersii, kamu naležyć aŭtarstva hetych radkoŭ, adnu ź ich raspaviadzie Andrej Chadanovič». Tut ža źjaviŭsia paet z hitaraj i ščyra pryznaŭsia, što byŭ u Amierycy, ale tolki ŭ Paŭdniovaj. Chadanovič vykanaŭ kolki pierakładzienych na biełaruskuju movu pieśniaŭ Leanarda Koena, nazvaŭ Kaściukieviča «soncam i nadziejaj biełaruskaha pierakładu» dy vykazaŭ spadzieŭ, što heta tolki pačatak. «Spadziajusia, što nas čakaje praciah pierakładaŭ konča patrebnych tut i ciapier ramanaŭ».
Što ž, spadziajomsia i my, čytačy i amatary amierykanskaj litaratury.
* * *
Raman / Pier. z anh. Pavał Kaściukievič. — Minsk: Łohvinaŭ, 2010. — 220 s. — (Biblijateka Baćkaŭščyny. Pierakłady. Kniha I) ISBN 978-985-6800-77-4
«Bojnia №5, abo Kryžovy pachod dzietak» («Slaughterhouse-Five, or The Children's Crusade») Kurt Vonehut (1922—2007) napisaŭ u 1969 hodzie. Aŭtabijahrafičny raman pra bambardavańnie Drezdenu padčas Druhoj suśvietnaj vajny.
Dzie nabyć:
«Kniharnia piśmieńnika», vuł. Kazłova, 2, teł.: 8 (017) 2849061
«Akademkniha», pr. Niezaležnaści, 72, teł.: 8 (017) 2920052
Siadziba TBM, vuł. Rumiancava, 13, teł.: 8 (017) 2848511
Uprava BNF, vuł. Varvašeni, 8, teł.: 8 (017) 2133008, 8 (017) 2845012
KniharniaŬhalerei, pr. Niezaležnaści, 37A, teł. 8 (017) 2906306,
Krama «Padziemka», pr. Niezaležnaści, 43
Knižnaja vystava «Śviet knih», vuł. Ja. Kupały, 27
Internet-kramaknihi.by
