«Kapienhahien» — BATE — 3:2
Biełaruskamu čempijonu na najbližejšy hod treba raźvitacca z marami pra hrupavy etap Lihi čempijonaŭ.
Biełaruskamu čempijonu na bližejšy hod treba raźvitacca z marami pra hrupavy etap Lihi čempijonaŭ. U sieradu kamanda Viktara Hančarenki prajhrała «Kapienhahienu».
Pieršaja hulnia kamand tydzień tamu ŭ Barysavie pryniesła ničyjny vynik — 0:0. Pryčym, z abodvuch bakoŭ hulnia atrymałasia zakrytaj.
Zatoje ŭ stalicy Danii atrymaŭsia ščyry futboł. Moža vinoj tamu staŭsia vypadak užo na 62‑oj siekundzie hulni, kali brazilec Siezar Sancin skarystaŭsia z taho, što biełarusy niaŭdała rabili štučny afsajd. Sancin nakiravaŭ miač mima spałochanaha Vieramko — 1:0.
I tut «Kapienhahien» prapanavaŭ BATE hulać pieršym numar, ale ničoha tałkovaha ŭ atakach nie atrymlivałasia. Chiba što Radzivonaŭ adnojčy ŭ štrafnoj nie trapiŭ pa miaču.
BATE tak uciahnułasia ŭ ataku, što časam zabyvała pra abaronu. I na 27‑aj chvilinie Uiljam Kvist (jon byŭ u zajaŭcy Danii na čempijanacie śvietu) dalokim udaram padvojvaje lik. Vieramko, zdajecca, u hetym momancie moh zhulać i lepš.
Tolki paśla takich nadzvyčajnych padziej BATE narešcie trochu zahulaŭ. Zrešty, hoł Kancavoha na 40‑oj chvilinie naradziŭsia ź ničoha. Nijakich pradpasyłak hetamu nie było. A jašče, zdajecca, u paŭabaroncy byŭ afsajd.
A ŭžo praz čatyry chviliny indyvidualnaje majsterstva prademanstravaŭ Pavieł Niachajčyk. Abyhraŭšy na zamachu abaroncu, jon pakłaŭ miač niby ŭ biljardnuju łuzu — 2:2.
Ciapier užo «Kapienhahienu» treba było zabivać, bo ničyja na karyść biełarusaŭ.
A ŭ samym pačatku tajma druhoha Radzivonaŭ moh vyvieści našych napierad, ale trapiŭ u papiarečynu. Datčanie prybrali inicyjatyvu da siabie. I hoła nie daviałosia doŭha čakać.
Taranny sieniehalec N'daje pracisnuŭsia ŭ štrafnuju, adšturchnuŭ Jureviča i z naska pasłaŭ miač u bramu — 3:2.
Biełarusy pajšli ŭ ataku, ale zrabić čarhovy podźvih tak i nie zmahli. Zamieny taksama zrabić hulniu bolš mocnaj nie zmahli. Što kazać, kali na zamienu byli vymušanyja vypuścić nieabstralanaha Dźmitryja Bahu, bo bolš niama kaho.
«Kapienhahien» upuściŭ jašče niekalki vierniakoŭ, Sasnoŭski dahulaŭsia da vydaleńnia. Datčanie prajšli dalej, jany ŭžo zabiaśpiečyli sabie futbolnuju vosień.
Nu a BATE zastajecca čakać piatnicy, dzie kamanda daviedajecca supiernika pa płej‑of Lihi Jeŭropy.
