Muzyčny teatr iznoŭ anansuje ambitnyja płany

Naprykancy siezonu, kali ŭsie dumki musiać być pra adpačynak, Muzyčny teatr nadzvyčaj aktyŭna anansuje prajekty na nastupny siezon.

13 lipienia z žurnalistami sustrakałasia biełaruski režysior Susana Cyruk. Karennaja minčanka, dačka słavutaha biełaruskaha dyryžora Juryja Cyruka, jana ŭ 1990-ch hadach pracavała ŭ Opiery. U 1997 h. jana pastaviła «Travijatu» Verdzi, jakaja da siońnia zastajecca repiertuarnym chitom Nacyjanalnaha teatru opiery i baleta.

Apošnija 11 hadoŭ sp-nia Cyruk žyvie i pracuje ŭ Rasii. Peŭny čas pracavała ŭ Maryinskim teatry, z 2001 h. — hałoŭnym režysioram u Rastoŭskim muzyčnym teatry. Stanaŭleńnie hetaha cikavaha kalektyvu — zasłuha biełaruskich artystaŭ, jakim pavodle roznych pryčyn nie znachodziłasia miesca na radzimie. Z 1999 pa 2003 hod hałoŭnym dyryžoram teatru byŭ Andrej Hałanaŭ, potym — Alaksandr Anisimaŭ. Rehularna pryjazdžaŭ na pastanoŭki dyryžor Aleh Lasun. Mienavita «biełaruskaja bryhada» zarabiła dla Rastoŭskaha muzyčnaha teatru najvialikšuju adznaku u jahonaj historyi. U siezonie 2003—2004 hh. «Łedzi Makbiet Mcenskaha ŭjezda» biełarusa Dźmitryja Šastakoviča (dyryžor Alaksandr Anisimaŭ, režysior Susana Cyruk, mastak Zinovij Marholin) atrymała ažno 4 naminacyi (lepšy opierny śpiektakl, lepšaja rabota dyryžora i režysiora ŭ opiery, lepšaja rabota mastaka ŭ muzyčnym teatry) samaha prestyžnaha rasijskaha teatralnaha konkursu «Załataja maska». I chacia łaŭreatam staŭsia tolki spadar Anisimaŭ, heta vializnaja pieramoha biełaruskich artystaŭ, chaj i daloka ad radzimy.

Siońnia biełarusaŭ u Rastovie ŭžo niama. Novaje kiraŭnictva vykraśliła ich navat z historyi teatru. Niaŭžo i tut palityka.

A sp-nia Cyruk u toj samy hod atrymała naminacyju ŭ raździele «Apiereta i miuzikł» za śpiektakl «U džazie tolki dziaŭčaty» u Novasibirskim teatry muzyčnaj kamiedyi. Śpiektakl staŭ łaŭreatam — pieramoha jašče bolš pačesnaja, čym asabistaja premija za režysuru.

U Minsku pra hetyja pieramohi amal nichto nie viedaŭ. Tut uładaryli zusim inšyja režysiory, dla jakich spadarynia Cyruk była niežadanaj kankurentkaj. Adnak ichniaja ŭłada skončyłasia, i u abodvuch našych muzyčnych teatrach adrazu zhadali pra Cyruk. Hienieralny dyrektar Nacyjanalnaha teatru opiery i baleta Uładzimier Hrydziuška zaprasiŭ jaje na pastanoŭku «Śniahurački» N. A. Rymskaha-Korsakava, a dyrektar Muzyčnaha teatru Aleksandr Piatrovič — na pastanoŭku miuzikła «U džazie tolki dziaŭčaty».

Praŭda, nazyvacca jon budzie «Adnojčy ŭ Čykaha», dyj sam tekst budzie zusim inšy, čym u navasibirskaj pastanoŭcy. U naš čas stavić aryhinalnyja viersii bradviejskich miuzikłaŭ — zanadta darahaja asałoda. Treba kuplać licenziju, vypłačvać aŭtarskija hanarary… Tut nie chopić usich finansaŭ Ministerstva kultury. Tamu našy pastanoŭščyki robiać reviu «pa matyvach», padbirajuć muzyku niekalkich aŭtaraŭ, pišuć novyja dyjałohi i teksty dla piesień. Tym bolej, što Susana Cyruk u hetaj spravie — čałaviek daśviedčany. Jana pierakłała na rasijskuju movu siem miuzikłaŭ, pryčym pieršymi byli ŭ 1993 hodzie akurat «Dziaŭčaty». Paźniej była rasijskaja viersija kultavaha francuzskaha miuzikła «Roméo & Juliette» i pieśni da rasijskaj viersii «Notre Dame de Paris».

Dla našaha Muzyčnaha teatru sp-nia Cyruk amal całkam pierarabiła toj materyjał, jaki jana staviła i ŭ Navasibirsku, i paźniej u Irkucku i Karahandzie. A ŭličvajučy toje, što sam miuzikł vielmi adroźnivajecca ad słavutaha filmu, jość nadzieja ŭbačyć aryhinalny tvor z samabytnaj režysuraj. Na repietycyi advodzicca ŭsiaho 26 dzion, premjera adbudziecca 11–12 vieraśnia (adkryćcio siezonu).

Premjeraj adznačyłasia i zakryćcio siezonu. Adnak «Maja žonka — padmanščyca» režysiorki Haliny Hałkoŭskaj mianie rasčaravała. Słabaja pjesa, nievyraznaja muzyka, prymityŭny ŭzrovień akciorskaj hulni. Typovaja savieckaja muzyčnaja kamiedyja dla rabočych i sialan daŭno sastarełaja jak žanr. Navošta ŭ staličnym teatry stavić heta? Chiba tolki dla taho, kab viečna maładaja sp-nia Hajda vyjšła na scenu ŭ šykoŭnym kaściumie, jaki zusim nie pasavaŭ da jaje piersanažu, i pakazała svajo bliskučaje majsterstva apieretačnaha kaskadu.

Patrebna niešta całkam novaje. Chiba simvalična, što hałoŭnaj padziejaj 14 lipienia ŭ Muzyčnym teatry stała zusim nie premjera, a prezientacyja miuzikła «Błakitnaja kamieja», jaki tolki zapuskajecca ŭ vytvorčaść.

«Błakitnuju kamieju» prapanavaŭ jaje aŭtar — rasijski estradny kampazitar i pradziusier Kim Brejtburh. U jahonym tvorčym bahažy 500 piesień i supracoŭnictva amal z usimi rasijskimi zorkami. Vialikuju papularnaść nabyŭ jahony televizijny prajekt «Narodny artyst». Adnak dla Brejtburha hetyja ramki stali ciesnyja, adsiul i cikavaść da žanru miuzikła. Popleč ź im — vydatnaja kamanda prafiesijanałaŭ. Aŭtar libreta — paet Karen Kavalerjan, režysior i chareohraf pastanoŭki — Mikałaj Androsaŭ, repietytar pa estradnamu vakału — viadomy śpiecyjalist u hetaj halinie, žonka kampazitara Valeryja Brejtburh.

«Błakitnaja kamieja» ŭžo vytrymała ŭ Dziaržaŭnym akademičnym rasijskim dramatyčnym teatry Respubliki Baškartastan bolš za 40 pradstaŭleńniaŭ. U asnovie siužeta — historyja kniažny Tarakanavaj i hrafa Arłova, siarod piersanažaŭ — Kaciaryna Druhaja. Hałoŭnaja pikantnaść — spałučeńnie prydvornych kaściumaŭ 18 stahodździa z sučasnaj pop-muzykaj i tancavalnymi stylami nakštałt brejk-dansu. Usio heta, na dumku aŭtaraŭ, musić być pryciahalnym dla moładzi. Sumniavajusia, što naša nacyjanalna śviadomaja moładź pojdzie hladzieć na Kaciarynu i Arłova. Adnak aŭtaram miuzikła takaja ideja ŭ hałavu nie prychodzić. Jany ž viedajuć tolki tuju Biełaruś, jakuju bačać na «Słavianskim bazary», i hetaja Biełaruś padajecca im častkaj Rasiei.

Adnak u kožnym razie kantakt z prafiesijanałami hetkaha kłasu budzie dla našaj kultury vielmi karysny. Tym bolej, što jany prapanujuć całkam nieznajomy dla nas amierykanski padychod da tvorčaha pracesu. Aprača ŭnutranaha kastynhu, jaki ŭžo prajšoŭ, budzie arhanizavany źniešni kastynh, na jaki zaprašajucca ŭsie achvotnyja. Kožny, chto ŭmieje śpiavać ci tancavać, moža pryjści i atrymać hałoŭnuju rolu. Hetki cud užo adbyŭsia va Ufie, dzie rolu Tarakanavaj vykonvaje dziaŭčyna-ryełtar, a rolu Arłova — žurnalist. Zrešty, abodva jany ŭžo źmianili prafiesiju. Kastynh adbudziecca ŭ siaredzinie vieraśnia ŭ Muzyčnym teatry, premjera zapłanavanaja na 4 lutaha 2011 hodu. Padrabiaznaści možna pahladzieć na sajcie http://golubaya-kameya.ru/musical/

Julija Andrejeva

Chočaš padzialicca važnaj infarmacyjaj
ananimna i kanfidencyjna? Pišycie redaktaru
«Našaj Nivy» ŭ TH

0

0

0

0

0

0