Djabał u rabro, seksualnaja zaležnaść u hałavu
Vielizarny śpis psichałahičnych zaležnaściaŭ ciapier papoŭniŭsia novaj — seksualnaj. Jak ličać vynachodniki seksualnaj zaležnaści — jana nie mieniej škodnaja dla zdaroŭja dy hramadstva, čym tradycyjnyja ałkaholnaja i internetavaja.
Takim čynam, kali seks dla vas — srodak pieraadoleć stres, vy paźbiahajecie niehatyŭnych abo balučych emocyjaŭ pry intymnych stasunkach, niazdatnyja ŭstalavać blizkija duchoŭnyja adnosiny, vinšuju, vy — seksualna zaležnaja asoba. Pry raźvićci zaležnaści takija ludzi stračvajuć kantrol nad svajoj zdolnaściu kazać «nie» i rabić vybar. Ich seksualnyja pavodziny robiacca častkaj cykła dumak, pačućciaŭ i dziejańniaŭ, jakija jany bolš nie ŭ stanie kantralavać
Mahčyma, niechta tut pačnie spračacca, bo čas ad času adnu‑dźvie sa zhadanych prykmietaŭ zdolny adšukać u sabie kožny čałaviek sa zdarovym libida. Ale śpiecyjalisty ŭdakładniajuć: dla seksualna zaležnaha čałavieka seks — žyćciovaja nieabchodnaść, dziela jakoj jon achviaruje ŭsim astatnim, u tym liku i ludźmi, jakija stanoviacca paprostu srodkam dla zadavalnieńnia patrebaŭ.
Zhodna z apisańniami śpiecyjalistaŭ, seksualna zaležny čałaviek — heta, chutčej za ŭsio, mužčyna paśla saraka hadoŭ, jaki viadzie absalutna narmalnaje žyćcio, maje ŭstalavany pobyt i siamju. Chvoraha ŭ im vydajuć tolki takija rysy jak:
praźmiernaja cikavaść da vypadkovych pałavych suviaziaŭ z małaznajomymi dy zusim nieznajomymi ludźmi;
ciaha da internet‑seksu, porna, telefonnych seks‑pasłuhaŭ i prastytutak;
adsutnaść turbotaŭ pra nastupstvy seksu;
absalutnaja abyjakavaść da adnosinaŭ pa‑za łožkam. Čaściej za ŭsio zaležnaść raźvivajecca ŭ niaŭpeŭnienych u sabie ludziej, jakija pieražyli abo pieražyvajuć śvietapohladny ci duchoŭny kryzis, adčuvajuć ułasnuju niepaŭnavartasnaść, viaduć unutrana pusty ład žyćcia, nie majuć zachapleńniaŭ, siabroŭ, blizkich.
Śpiecyjalisty pakul hublajucca, da čaho adnieści seksualnuju zaležnaść — pamiežnaha stanu ci kliničnaha zachvorvańnia, ale sychodziacca na tym, što ŭ chatnich umovach pazbavicca ad hetaj trascy niemahčyma.
