Lepš darahi haz, čym Mytny sajuz
Palityčnaja elita, biurakratyčny aparat i siłavyja struktury skansalidavanyja i spansaravanych z Maskvy pieravarotaŭ nie dapuściać. Piša Andrej Dyńko.
Piša Andrej Dyńko.
Nie ŭ 200 miljonach zapazyčanaści pryčyna hazavaj vajny — Rasija adterminoŭvała i bolšyja pazyki.
A ŭ čym ža? Chočuć skałupnuć Łukašenku? Pasoł Surykaŭ jasna pryznaŭ, što ŭvažaje heta nierealnym.
Biełaruskaja palityčnaja elita, biurakratyčny aparat i siłavyja struktury skansalidavanyja i spansaravanych z Maskvy pieravarotaŭ nie dapuściać.
Tolki adna racyjanalnaja pryčyna bačycca dla zavaruchi — Mytny sajuz. Jaki ŭjaŭlajecca Pucinu asnovaj budučaha Jeŭraazijackaha sajuza — doŭhaterminovaha ŭtvareńnia, u jakim Rasija budzie daminavać. Takoje sabie tvorčaje pieraasensavańnie vopytu Jeŭrasajuza, jaki ŭtvaryŭsia ź Jeŭrapiejskaj ekanamičnaj supolnaści, dla patrebaŭ budaŭnictva sučasnaj impieryi.
Kali Biełaruś zaviaźnie ŭ sałodkim pavidle Mytnaha sajuza, u jaje nie zastaniecca mahčymaści dla jeŭrapiejskaj ekanamičnaj intehracyi. Raz mytaŭ nie budzie tut, jany buduć tam.
U palityčnym i kulturnym vyniku hetaha, budzie mienš šancaŭ dafarmavać nacyju.
Jak ni paradaksalna, vybar tannaha hazu na doŭhaterminovuju pierśpiektyvu ekanamična stratny.
Lepš darahi haz, čym Mytny sajuz. Jak pakazała najnoŭšaja historyja, na doŭhich adrezkach času susiedziam Rasii ekanamična bolš apłačvajecca być Finlandyjaj, čym respublikaj-siastroj.
Usie hetyja hazavyja tancy z zorkami patrebny tolki dla taho, kab dyscyplinavać Łukašenku i zmusić jaho padpisać Mytny kodeks — pałamajecca na publiku, dla elektaratu, i padpiša, jak vasał, jak padpisaŭ «Biełtranshaz» i KSAR. Maskva nie maje inšych zadač na siońnia — prynamsi, jany nie zaŭvažnyja. Tamu i lideram apazicyi treba dziejničać adpaviedna. Havaryć praŭdu, jak adna ź jaje inicyjatyvaŭ zaklikaje.
Što da łukašenkaŭcaŭ, dyk hazavyja tancy dajuć im čarhovuju mahčymaść ad Mytnaha sajuza ŭchilicca. Z usimi vyciakajučymi.
