Kudy Janukovič razvaročvaje Ukrainu

Na hetym tydni daviałosia pabyvać na ŭkrainskim inviestycyjnym forumie ŭ Łondanie. Ukrainskija čynoŭniki z urada Janukoviča — u darahich strojach, ź bliskučaj anhlijskaj movaj. Abiacajuć pakiet prahresiŭnych reformaŭ na praciahu bližejšych miesiacaŭ: pakul što jany majuć mandat na ich, bo i parłamient, i ŭrad pakul što ŭ rukach «bieła-sinich». Ź inšaha boku, u kułuarach tyja-inšyja ludzi z ukrainskaha biznesu dosyć skieptyčna staviacca da pryhožych słovaŭ uradoŭcaŭ: maŭlaŭ, treba niešta dziela spravazdačy zrabić. Chacia i jany nie abmaŭlajuć, što za paru miesiacaŭ było ažyćciaŭlena niamała karysnych źmienaŭ u zakonadaŭstvie.

Tak ci inačaj,

z ekanamičnaha punktu hledžańnia pakul što prezidenctva Janukovyča možna acanić pazityŭna. Razmarozka adnosin z takim bujnym susiedam jak Rasija — reč abjektyŭna stanoŭčaja dla ŭkrainskaj ekanomiki.

Pry hetym pilnyja naziralniki mahli zaŭvažyć zajavy Janukovyča pra toje, što heta razmarožańnie nie kasuje kursa na jeŭrapiejskuju intehracyju Ŭkrainy i što źlićcia «Hazproma» i «Naftohaza» pa schiemie «5% u abmien na 100%» nie budzie. Namieśnik hałavy administracyi Janukovyča skazała, što novyja pahadnieńni Ŭkrainy nie pavinny supiarečyć starym pahadnieńniam: to bok Ukraina nie pojdzie ni ŭ jakija mytnyja sajuzy, kali heta budzie supiarečyć udziełu ŭ WTO.

Taksama vartaja asablivaha zhadvańnia simbaličnaja padzieja: Janukovyč zrabiŭ tak, što padčas svajho vizita ŭ Kijeŭ

prezident Rasii Miadviedzieŭ uskłaŭ vianok da pomnika achviaraŭ Haładamoru.

Heta što da nibyta antyŭkrainskaści ideałohii novaha prezidenta.

Niama takoj užo antyŭkrainskaści, pakul što novaja ŭłada va Ŭkrainie demanstruje prahmatyzm, chitraść i dypłamatyzm - što jana i pavinna demanstravać. Inšaja reč, što dziakujučy prezidenctvu Juščanki nieabchodny dla hetaj dypłamatyčnaści kampramis, bałans skrajnaściaŭ mocna ssunuŭsia ŭ pravilny prozachodni bok.

Isnuje peŭnaja naściaroha što da aŭtarytarysckich tendencyj Janukovyča, ale ž apazicyja, mnie zdajecca, maje dastatkova ŭpłyvu, kab nie dapuścić ustalavańnia paŭnavartasnaha aŭtarytarnaha režyma.

Adnačasova źviarnicie ŭvahu, jak padvysiłasia rola Ŭkrainy ŭ kantekście rasijska-biełaruskich adnosin: na fonie ŭzmacniajučychsia stasunkaŭ z Rasijaj, Ukraina zastajecca adnoj ź vielmi niešmatlikich demakratyčnych krain, jakija majuć aficyjnyja dačynieńni ź biełaruskim kiraŭnictvam, a ź niadaŭniaha času zrabiłasia i tranzytoram vieniesuelskaj nafty ŭ Biełaruś.

***

Paviedamleńni pra rasijska-ŭkrainskija intehracyjnyja inicyjatyvy ŭ apošnija tydni iduć, zdajecca, niaspynnaj płyńniu: tanny haz u abmien na praciah znachodžańnia Čarnamorskaha fłotu ŭ Krymie, łahistyka, budaŭnictva karabloŭ, avijabudaŭnictva, elektraenierhietyka, chimičnaja pramysłovaść i navat śpiecsłužby.

Pa ŭsim vidać, na apošnich ukrainskich prezidenckich vybarach Rasija zdoleła ažyćciavić biasprojhryšnuju kambinacyju, pry jakoj abodva kandydaty byli prarasijskimi.

U apošnija miesiacy pierad vybarami ŭ prarasijskim ampłua zaśviaciłasia Julija Tymašenka — uzhadajma chacia b tryumfalnuju sustreču z Pucinym, dzie jana łajalna ŭśmichałasia žartam rasijskaha kiraŭnika pra Juščanku i jaho chaŭruśnika Saakašvili. Fihura dy ideałohija Viktara Janukovyča byli viadomyja jašče z 2005 hoda.

(…)

Naściarožvaje nie pašyreńnie ŭkrainska-rasijskaha ekanamičnaha supracoŭnictva — urešcie, Ukraina ciapier nie ŭ tym ekanamičnym stanoviščy, kab achviaravać ekanamičnymi vyhodami dziela palityčnych mierkavańniaŭ. Abaznačany prarasijski ideałahičny trend taksama nie nahoda dla naściarohi: dyskusija pamiž Uschodam i Zachadam — imanientnaja dla Ukrainy reč, i hety majatnik budzie zaŭsiody hajdacca ci to ŭ adzin, ci to ŭ druhi bok.

Naściarožvaje treci faktar, jaki supravadžaje vyšej zhadanyja: nasoŭvańnie pucinska-łukašenkaŭskich mietadaŭ palityčnaj baraćby, pra jakija pačała zajaŭlać apazicyja.

Źjaŭlajucca pieršyja sihnały što da abmiežavańnia svabody słova i pastupovaha nasoŭvańnia samacenzury na ŭkrainskaj televizii. Niekatoryja apazicyjnyja publicysty pačali hučać užo zusim piesimistyčna. Prykra za Rasiju: čarhovy raz robicca vidavočnym, što na postsavieckaj prastory prarasijskaść idzie poruč z antydemakratyčnaściu.

Hałoŭnym dasiahnieńniem prezidenctva Viktara Juščanki ličycca ŭmacavańnie demakratyčnych instytutaŭ. Što ŭ Juščanki nie atrymałasia, dyk heta praviadzieńnie rašučych ekanamičnych reformaŭ, jak heta bliskuča zrabiŭ u Hruzii Michaił Saakašvili. Raspłataj za heta i jość prezidenctva Janukovyča.

Całkam na «Novaj Jeŭropie»

Aleś Čajčyc

Chočaš padzialicca važnaj infarmacyjaj
ananimna i kanfidencyjna? Pišycie redaktaru
«Našaj Nivy» ŭ TH