Niekatoryja vytvorcy butylavanaj vady ŭ Biełarusi raźlivajuć vodapravodnuju
Pry hetym na etykietcy praduktu ŭkazana, što vada pastupaje z artezijanskich śvidravin.
Niekatoryja vytvorcy butylavanaj vady ŭ Biełarusi raźlivajuć vodapravodnuju vadu,
paviedamiŭ viadučy navukovy supracoŭnik adździeła hidrahieałohii RUP «Biełaruski navukova‑daśledčy hieołaharaźviedačny instytut» Raman Stankievič 17 sakavika na pasiadžeńni kruhłaha stała ŭ Minsku.
Pavodle jaho słoŭ, u 2009 hodzie supracoŭniki instytuta abśledavali prykładna 10 pradpryjemstvaŭ pa vytvorčaści butylavanaj vady ŭ Minskim rajonie.
Hetaja praca pravodziłasia z metaj dapamahčy ŭ stvareńni narmatyŭnaj bazy pa vybary i asvajeńni krynic vady, pryznačanaj dla butylavańnia.
«Vyśvietliłasia, što bolšaść pradpryjemstvaŭ majuć artezijanskija śvidraviny, ale sioj‑toj raźlivaje vadu z vodapravoda», — skazaŭ Stankievič. Pry hetym na etykietcy praduktu ŭkazana, što vada pastupaje z artezijanskich śvidravin. Pavodle mierkavańnia śpiecyjalista, choć vada z vodapravoda pierad butylavańniem prachodzić ačystku i kandycyjanavańnie, spažyviec maje prava viedać, adkul jana pastupiła.
«Heta pytańnie sumlennaści vytvorcy, ci adpaviadaje napisanaje na etykietcy źmieścivu butelki»,
— zajaviła doktar‑hihijenist adździaleńnia kamunalnaj hihijeny Respublikanskaha centra hihijeny, epidemijałohii i hramadskaha zdaroŭja Iryna Žaŭniak. Pry hetym sanitarnyja praviły rehulujuć tolki jakaść vady, a nie krynicu jaje pachodžańnia. U adpaviednaści ź imi vada pieršaj katehoryi — vada pitnoj jakaści niezaležna ad krynicy jaje atrymańnia. Pavodle słoŭ Žaŭniak, takaja vada pavinna być tolki biaśpiečnaj dla čałavieka pa mikrabijałahičnych i sanitarna‑chimičnych pakazčykach. Vada vyšejšaj jakaści — heta fizijałahična paŭnavartasnaja vada, jakaja ŭtrymlivaje bijałahična aktyŭnyja elemienty, soli ŭ tych kancentracyjach, jakija patrebny čałavieku pa fizijałahičnych normach.
Jak paviedamiŭ Stankievič, pavodle źviestak Dziaržkamstata, u 2009 hodzie ŭ Biełarusi naličvałasia 41 pradpryjemstva pa raźlivu minieralnaj i 30 — presnaj vady.
