Ab čym nieabchodna pamiatać, zbirajučysia na koŭzanku
Adzieńnie. Kali vy zbirajeciesia na koŭzanku, apranucca treba ciopła i ŭ toj ža čas lohka. Staraja dobraja bavoŭna ŭ hetym vypadku niezamiennaja, bo lepš za inšyja tkaniny zachoŭvaje ciapło. Addajcie pieravahu trykatažnaj majcy z doŭhimi rukavami, pavierch jakoj nadzieńcie toŭsty svitar i nie zabudźcie pra ciopłyja kałhotki ci spodniuju bializnu. Štany i kurtka ź niepramakalnaha materyjału, a taksama šapačka, jakaja zakryvaje vušy, zavieršać vaš vobraz.
Abutak i kańki. Čaraviki pavinny ščylna abchoplivać stupniu, adnak pry hetym nie sciskać palcy i ščylna ŭtrymlivać halonkastupniovy sustaŭ. Stałaje śćviardžeńnie, što čaravik treba brać na paŭpamiera bolšy za nahu, sumnieŭnaje. Vyrašalnaje značeńnie maje toje, nakolki kamfortna vy siabie adčuvajecie. Prymiervać čaravik lepš na škarpetku, u jakoj vy budziecie katacca. Pry hetym pamiatajcie, što jeŭrapiejski pamier adroznivajecca ad našaha na 1‑2 pazicyi.
Jašče adzin važny momant — pravilnaje šnuravańnie. Čaravik šnurujecca pastupova, znizu ŭvierch, pryčym z roznaj siłaj uciahvańnia: słabiej u nasočnaj častcy (kab nie parušaŭsia krovazvarot), ščylniej u padjomie (dla dasiahnieńnia maksimalna ščylnaj fiksacyi halonkastupniovaha sustava z metaj abarony jaho ad traŭmy) i, narešcie, u vobłasci kručkoŭ varta znoŭ krychu asłabić šnuroŭku. Pierad pieršym katańniem, kab čaraviki lepš siadzieli na nazie, rekamiendujecca ich niekalki razoŭ zašnuravać i rasšnuravać. Prymiervajučy kańki, abaviazkova ŭstańcie i prajdziciesia ŭ ich. Pry lubym dyskamforcie adrazu mianiajcie madel, tamu što, kali vy vyjdziecie na lod, hety dyskamfort šmatrazova pavialičycca.
Biaśpieka. Nie varta razvivać vialikuju chutkaść, kali na katku jość dzieci. Navat kali vy vielmi ŭpeŭniena staicie na kańkach, pastarajciesia ŭstrymacca ad zanadta ryzykoŭnych piruetaŭ, kab zrabić uražańnie na tych, chto vas akružaje. Stupajučy na lod, pamiatajcie, što vas čakajuć uźloty i padzienni. Budźcie da ich hatovyja.
