Toyota adklikaje z amierykanskaha rynku 2,3 młn. aŭto z pryčyny defiektu piedali hazu
Japonskaja kampanija Toyota Motor adklikaje kala 2,3 młn. svaich aŭtamabilaŭ z ZŠA z pryčyny prablem ź piedallu hazu.
Razmova tyčycca mašyn madelaŭ RAV4, Corolla, Matrix, Avalon, Camry, Highlander, Tundra, Sequoia, vypuščanych na zavodach kampanii z 2005 pa 2010 hod.
Pavodle słovaŭ adnaho z pradstaŭnikoŭ aŭtahihanta, u hetych aŭtamabilach isnuje niebiaśpieka dačasnaha vychadu sa stroju miechanizmu piedali aksieleratara. Heta, u svaju čarhu, moža pryvieści da taho, što piedal moža zabłakavacca padčas ruchu.
Dziela likvidacyi hetaha defiektu aŭtaŭładalnikam prapanujecca źviarnucca da dyleraŭ, u jakich jany nabyli svaje mašyny.
Cikava, što heta ŭžo nie pieršy vypadak adklikańnia aŭtamabilaŭ Toyota'j.
Tak, u kastryčniku 2009 hoda kampanija adklikała 4,2 młn. aŭtamabilaŭ z ZŠA z‑za defiektaŭ dyvankoŭ u mašynie, a taksama ŭ niekatorych vypadkach z‑za mahčymaści admovy tarmaznoj sistemy. U cełym u 2009 h. aŭtahihant adpraviŭ u ramont 4,9 młn. mašyn z‑za nieadpaviednaści normaŭ biaśpieki pasažyraŭ.
