Heta elemientarna, Ryčy!
Ci «Šerłak Chołms», novaja stužka Haja Ryčy, viernie režysiora ŭ vyšejšuju lihu top-pradusaraŭ?
Haj Ryčy cudoŭna viedaje, što pa časie bahata chto budzie pryhadvać jaho tolki jak byłoha muža Madonny, što ŭ vyniku razvodu atrymaŭ 60 miljonaŭ funtaŭ. Tamu, zrabiŭšy svoj śviežy trymcieńnik, 41-hadovy režysior choča pierakanać nas u advarotnym, davieści, što varty ŭvajści ŭ historyju kiniematohrafa, a nie śvieckaj chroniki. U toj samy momant, kali jaho karjera i žyćciovy šlach pieratvarylisia ŭ ćmianuju tajamnicu, jon źviarnuŭsia pa dapamohu da samaha znakamitaha syščyka ŭ śviecie. Ci ž «Šerłak Chołms», novaja stužka Haja Ryčy, jakaja vyjdzie ŭ apošni dzień staroha hoda ŭ prakat, viernie režysiora ŭ najvyšejšuju lihu top-pradusaraŭ?
Pačatak karjery abiacaŭ Haju Ryčy šmat: pieršaja ž paŭnamietražka – šalony pośpiech. Toje byli «Karty, hrošy, dźvie ruli», što vyjšli ŭ 1998. Film uklučaŭ sceny z šykam źniataha hvałtu, nievialičkija, ale trapnyja eratyčnyja epizody, a taksama miłyja sercu kožnamu brytanca kadry z papularnym futbalistam Uini Džonsam (toj atrymaŭ rolu vaŭkavataha rekiecira). Pryhody čatyroch simpatyčnych (i ŭnutry i zvonku) niaŭdačnikaŭ vyklikała buru zachapleńnia i chvalu padražańniaŭ pa ŭsim śviecie. Film byŭ źniaty za jaki miljon, a prynios u 25 razoŭ bolš. Dla Halivuda, viadoma, nie vielmi, ale dastatkova, kab pierakanać amierykancaŭ davieryć Haju Ryčy i bolšyja prajekty.
 Džons z tymi samymi dźviumia rulami. Kadr sa stužki |
U dadatak, padčas zapisu hukavaj darožki da filma, Haj Ryčy paznajomiŭsia z Madonnaj. Viasielle nie zamarudziła, i voś pry kancy 2000 hodu režysior maje ŭ najaŭnaści narodžanaha syna i šatłandski zamak z žonkaj-zorkaj u kamplekcie.
Padściobnuty pobytavaj uładkavanaściu i tvorčymi dasiahnieńniami, u toj ža hod Ryčy zdymaje «Sneč» (ras. «Bolšoj kuš»), bajavik, taksama pryśviečany prablemam raźmierkavańnia ź ciažkaściu nažytych mafijoznych kapitałaŭ. Hetam razam mahčymaści kastynhu ŭ Ryčy byli šyrejšyja: voś vam i Bred Pit, i Bienisijo Del Tora. Da taho ž režysior nie zabyŭsia pra svaich bratoŭ pa kolišniaj nizkabiudžetnaści: Džonsa i Džejsana Stethiema, jaki z časoŭ «Dvuch rulaŭ» zrabiŭsia zorkaj pryhodnickich stužkach, jak to «Italjanskaja praca» i «Pieravozčyk». I znoŭ, znoŭ pośpiech.
«Rakienrolščyk», źniaty ŭ 2008 pavodle tych ža stralaj-dahaniaj receptaŭ nie ŭraziŭ ani krytykaŭ ani prychilnikaŭ. Pieršyja skazali, što pieršyncy byli daścipniejšyja: «Rakienrolščyku» ža brakavała śviežaści i niepasrednaści, znoŭ hetyja procipastaŭleńni brydkich mafijanieraŭ-vierchavodnikaŭ i simpatyčna-mrojnych «šaściorak», dy kolki možna adno i toje ž!... A publika prahałasavała nahami: ci to čorny humar kryminalnikaŭ nabiŭ askomy, ci to voka zamyliłasia ad krasunoŭ z «uzi», i tamu hledačy paličyli za lepšaje zastacca doma.
 "Rakienrolščyk": tyja ž ruli, tolki mienšyja |
Krytyki i šarahovyja kinamany pahadžajucca: 140-chvilinny i 60-miljonny «Šerłak Chołms» — heta dla Ryčy cudoŭnaja mahčymaść davieści šyrokaj publicy, što jon pa-raniejšamu maje što prapanavać śvietu jak tvorca. I što jon u stanie źmianić staruju płaścinku, urešcie. Chacia Haj Ryčy kaža, što jaho Chołms budzie suhučny našamu času. Hieroj budzie nahadvać sučasnaha trylernaha prajdziśvieta. Pa-pieršaje, Chołms budzie pradstaŭleny vialikim žyhała, jakomu nie čužoje ŭsio mužčynskaje (to bok, žanočaje). Pa-druhoje, syščyk zaŭsiody hatovy kinucca ŭ hałavakrutny ekšn: jon nie tolki vykryvaje złačynstvy pasłuhujučysia vysiłkami ŭłasnaha kloku, ale i haniajecca za złačyncami, dziakujučy svaim natreniravanym ciahlicam. Ciapier Chołms i Vatsan buduć vyśviatlać adnosiny, nie siedziačy la kamina i dadajučy da kožnaha skazu prydomak «ser», a machajučy na baksiorskim rynhu kułakami. U dadatak film pastaŭleny nie pavodle Konan Dojlevych tvoraŭ, a pa vytvornaj — pavodle hrafičnaha ramanu (a paprostu komiksu), jaki napisaŭ Łajaneł Vihram.
Ci Šerłak Chołmas — kałasalny pośpiech abo tatalnaja paraza Haja Ryčy, pabačym: z 1 studzienia ŭ biełaruskich kinateatrach.
